ޖުމްހޫރީ ޕާޓީ ޖޭޕީ) ގެ ރިޔާސީ ކެންޑިޑޭޓް ގާސިމް އިބްރާހީމް ކެމްޕޭނަށް މިއަދު ދެ އަތޮޅަށް ފުރާ ގޮތަށް ހަމަޖެހިއްޖެ އެވެ.
އޭނަ ވަޑައިގަންނަވަން ހަމަޖެހިފައި ވަނީ ހދ އާއި ށ. އަތޮޅަށެވެ. މި ދެ އަތޮޅަށް ކުރައްވާ ކެމްޕޭން ދަތުރުގައި ގާސިމަށް ތާއީދު ހޯދަން ސިޔާސީ އެކި ހަރަކާތްތައް ކުރިއަށް ގެންދާނެ އެވެ. އެގޮތުން ޖޭޕީގެ މެނިފެސްޓޯގައި ހިމަނާފައިވާ ކަންކަން ރައްޔިތުންނާ ހިއްސާކުރާނެ އެވެ.
ގާސިމްގެ ކެމްޕޭން ދަތުރުގެ ތެރެއިން ފުރަތަމަ ވަޑައިގެންނަވާނީ ހދ. އަތޮޅުގެ ރަށްތަކަށެވެ. އެގޮތުން ކުޅުދުއްފުއްޓާއި މަކުނުދު އާއި ނޮޅިވަރަމާއި ނޮޅިވަރަމްފަރާއި ހަނިމާދު އަށް ވަޑައިގަންނަވާނެ އެވެ. ށ. އަތޮޅުގެ ދަތުރުފުގައި ކަނޑިތީމާއި ގޮއިދު އާއި ކޮމަންޑު އާއި ފުނަދު އާއި މިލަންދޫ އަދި ފޯކައިދުއަށް ވަޑައިގަންނަވާނެ އެވެ.
މި ދަތުރުތަކުގެ ތެރެއިން ކުޅުދުއްފުއްޓާއި ފޯކައިދޫގައި ބޮޑު ދެ ޖަލްސާ ބާއްވާނެ އެވެ.
ގާސިމްގެ ކެމްޕޭން ރަސްމީކޮށް ފެއްޓެވީ އޭނަގެ އުފަން ރަށް އދ. މާމިގިލިންނެވެ. އޭނަގެ ރަނިންމޭޓަކީ އަމީން އިބްރާހީމެވެ.
ގާސިމަށް ތާއީދު ހޯދަން ޖޭޕީގެ ކެމްޕޭން ޓީމްތަކެއް މިހާތަނަށް ރާއްޖޭގެ އެކި ހިސާބުތަކަށް ދަތުރުތައްކޮށްފައިވެ އެވެ.
ޖުމްލަ 8 ކެންޑިޑޭޓުން ވާދަކުރައްވާ ރިޔާސީ އިންތިހާބު އޮންނާނީ އަންނަ މަހުގެ 9 ގަ އެެވެ.