އުރީދޫ މޯލްޑިވްސްގެ މަސް ރޭހުގެ އައްޑޫ ޗެމްޕިއަންކަން ފެހުރިހި ޓީމުން ހޯދައިފި އެވެ.
އެ ޓީމު މުބާރާތުގެ އައްޑޫ އެޑިޝަން އިއްޔެ ކާމިޔާބުކުރުމާ ގުޅިގެން ފައިސާގެ އިނާމަކަށް 25،000ރ. އާ އެކީ ޓްރޮފީއެއް ވެސް ލިބިފައިވެ އެވެ. އައްޑޫގެ އެޑިޝަންގެ ވަނަތައް ހޮވީ ރޭގަ އެވެ. އެގޮތުން އެކަމަށްޓަކައި މަރަދޫ ބަނދަރުމަތީގައި ބޭއްވި ކުލަ ގަދަ ރަސްމިއްޔާތުގައި އުރީދޫ ކުންފުނީގެ ސީއީއޯ ޙާލިދު ހަސަން އަލް-ހަމަދީގެ އިތުރުން އުރީދޫގެ އިސްވެރިންނާއި އައްޑޫ މޭޔަރު އަލީ ނިޒާރު ބައިވެރިވެ ވަޑައިގެންނެވި އެވެ.
އުރީދޫ މަސް ރޭހުގެ އައްޑޫ އެޑިޝަންގެ ދެވަނަ ޓީމަކީ ޓީމު ހޮނޑެލި އެވެ. އަދި ތިން ވަނަ ހޯދީ ޓީމް ބަރަކޫޑާ އެވެ. މުބާރާތުގެ ވަނަތައް ހޯދި ޓީމްތަކަށް ބަލާ އިރު، ފެހުރިހި ޗެމްޕިއަންކަން ހޯދީ 220.9 ޕޮއިންޓާ އެކީގަ އެވެ. އަދި ހޮނޑެލި 141.6 ޕޮއިންޓުން ދެވަނަ ހޯދި އިރު، ބަރަކޫޑާ ތިން ވަނަ ހޯދީ 131.9 ޕޮއިންޓުންނެވެ.
ދެވަނަ ޓީމަށް 10،000ރ. ގެ ފައިސާގެ އިނާމެއް ދީފައިވާ އިރު، ތިންވަނަ އަށް 5،000ރ. ފައިސާގެ އިނާމެއް ދިނެވެ.
މުބާރާތުގެ ޗެމްޕިއަންކަން ނެގުމުގެ އިތުރުން ޓީމް ފެހުރިހި ނަޖާ ވަނީ މި މުބާރާތުގެ އެންމެ ބަރު މަސް ބާނައިފައެ ވެ. އޭނަ ބާނާފައިވަނީ 5.5 ކިލޯގެ ކުރުމަހެކެވެ. އެހެންވެ ނަޖާ އަށް ސީ ގިއާގެ ފަރާތުން 875 ޑޮލަރުގެ އަގުހުރި ހަދިޔާއެއް ޕެކޭޖެއް ދީފައިވެ އެވެ.
މުބާރާތުގެ އެންމެ މޮޅު އަންހެން ކެޔޮޅަކަށް ޓީމް ފެހުރިހައިގެ އަޒުލިފާ އަޒީޒަށް ލިބުނު އިރު، އެންމެ މޮޅު ފިރިހެން ކެޔޮޅަކީ ހެޕީ މާކެޓް ޓީމްގެ އިބްރާހީމް އަބްދުﷲ (ޑީޑީ) އެވެ.
މީގެ އުރީދޫ މަސް ރޭހުގެ ތާރީޙުގައި އަލަށް އައްޑޫން ކައްޓެޅިއެއް ބާނައިފަ އެވެ. ފުވައްމުލަކަށް ހާއްސަ އެ މަސް މަސް ރޭހުގައި ބޭނީ ކަރަކޫޑާގެ ޝާނީޒާއި ޝާނިޒާއި އަދި ޖިނާ އެވެ.
އުރީދޫ މަސް ރޭހުގެ އައްޑޫ އެޑިޝަންގައި 7 ޓީމު ވާދަކުރި އެވެ. އެއީ ޓީމް އޭއޭއާރްސީ، ޓީމް ބަރަކޫޑާ، ޓީމް ފެހުރިހި، ޓީމް ހެޕީ މާކެޓް، ޓީމް ހޮނޑެލި، ޓީމް ސްކޫޕެ ކަންމަތި އަދި ޓީމް އެމްޓީސީސީ އެވެ.
އުރީދޫގެ 18 ވަނަ އަހަރީ ދުވަހާ ގުޅުވައި މި އަހަރުގެ މަސް ރޭސް ހާއްސަކުރީ ރާއްޖޭގެ ހަތަރު ސިޓީއަށެވެ. އެގޮތުން މުބާރާތް ފެށީ މި މަހުގައި މާލެއިންނެވެ. މުބާރާތް ނިންމައިލާނީ މި މަހުގެ 25 ގައި ފުވައްމުލަކުންނެވެ. ކުޅުދުއްފުށީގެ އެޑިޝަން ބޭއްވީ މި މަހުގެ 11 ގަ އެވެ.
މި މުބާރާތުގައި ކޮންމެ ސިޓީއަކުން 3،2،1 އާއި އެންމެ މޮޅު އަންހެން ކެޔޮޅާއި އެންމެ މޮޅު ފިރިހެން ކެޔޮޅު ހޮވަ އެވެ. އެގޮތުން އެއް ވަނަ ޓީމަށް 25،000ރ، ދެ ވަނަ ޓީމަށް 10،000ރ، ތިން ވަނަ ޓީމަށް 5،000ރ، އެންމެ މޮޅު ފިރިހެން ކެޔޮޅާއި އަންހެން ކެޔޮޅަށް 1،000ރ. ގެ އިނާމު ލިބެ އެވެ.