ރައީސް އިބްރާހީމް މުހައްމަދު ސޯލިހު ވެރިކަމުގެ ދެވަނަ ދައުރަކަށް ވާދަކުރައްވަން ނިންމެވީ އިންޑިއާ މަޖުބޫރުކޮށްގެން ކަމަށް ޖުމްހޫރީ ޕާޓީގެ ކެންޑިޑޭޓް ގާސިމް އިބްރާހީމް ވިދާޅުވެއްޖެ އެވެ.
ކެމްޕޭނަށް މިހާރު އަތޮޅުތަކަށް ކުރައްވާ ދަތުރުގެ ތެރެއިން މިއަދު މެންދުރުފަހު ށ. ގޮއިދޫގައި ގާސިމް ވަނީ މި ސަރުކާރުން އިންޑިއާ ބާއްވާ ގުޅުމަށް ވަރަށް ބޮޑަށް ފާޑުވިދާޅުވެފަ އެވެ. އޭނާ ވިދާޅުވީ މިކަމުގެ ސަބަބުން ރާއްޖޭގެ މިނިވަން ކަމަށް އަސަރުކުރާ ވަރަށް އެ ގައުމުގެ ނުފޫޒު ރާއްޖޭގައި ގަދަވެފައިވާ ކަމަށެވެ.
ގާސިމު ވިދާޅުވި ގޮތުގައި އިންޑިއާގެ ރުހުން ނެތި ސަރުކާރަށް މިހާރު އެއްވެސް ކަމެއް ކުރެވޭ ކަމަކަށް ނުވެ އެވެ. އެގޮތުން އިންޑިއާއިން ދޭ ކޮންމެ ލޯނެއް ވެސް ބަލައިގަންނަން ވެސް މަޖުބޫރުކޮށްފައިވާ އިރު، ދެވަނަ ދައުރަކަށް ރައީސް ނުކުންނެވީ ވެސް އިންޑިއާ އިން މަޖުބޫރުކޮށްގެން ކަމަށް ވިދާޅުވި އެވެ.
Gaumee Roohugai nikume Gaumee Candidate @qasimibrahim mifaharu hovan ehbajehey. Ehbeyfulhaa ge kondigai ehligen noon gothah meegen kurin ehves candidate akah verikamah aadhevifa eh nuvey.@ameenmaldives @ali20waheed @ahmed_nihan @AzleenAhmed #HaaskandaalaaHamajeheyne pic.twitter.com/pzeXZA5Mf5
— Laamu Esse (@EsseXohan) August 19, 2023
"އިބްރާހިމް މުހައްމަދު ސޯލިހަކީ ވަރަށް ކެތްތެރި، މަޑުމައިތިރި، ވަރަށް ކޫލް ބޭފުޅެއް، މިނިވަންކަން ގެއްލުމުގެ އިލްތިޒާމެއް އެމަނިކުފާނު ބޮލުގައި އެޅުވޭ ގޮތަށް ކޮށްފައި ދެވަނަ ދައުރެއް ހޯއްދަވަން ނުކުންނަވަންވީ ސަބަބެއް ނެތް،" ގާސިމު ވިދާޅުވި އެވެ. "މަޖުބޫރު ކަމެއް ނެތިއްޔާ، ކޮން ބަޔެއްގެ މަޖުބޫރު ކަމެއްތޯ، އެބަ ފެނޭ ނޫންތޯ".
އޭނަ ވިދާޅުވީ ހދ. ހަނިމާދު އަށް އިއްޔެ ވަޑައިގަތް އިރު ވެސް ދިވެހި ސިފައިންގެ އިތުރުން ބޭރު އެހެން ގައުމެއްގެ ސިފައިން ވެސް ދެކެވަޑައިގަތް ކަމަށާއި ރައީސް ސޯލިހު އަދިވެސް އިތުރު ފަސް އަހަރު ބަހައްޓަވަން އިންޑިއާ އިން ބޭނުންވާ ކަމަށެވެ.
"އަޅުގަނޑަށް އެނގޭ އެއްޗަކީ [އިންޑިއާ އިން] ޑޮނޭޝަން ނުދޭނެ ލޯނު އެއީ، އެ އަނބުރާ ދައްކާނެ ގޮތެއް ނޭނގުނަސް އިމެއް މިނެއް ނެތި އެ ނަގަނީ މަޖުބޫރު ކަމެއް އޮވެގެން." ގާސިމް ވިދާޅުވި އެވެ.
އޭނަ ފާހަގަކުރެއްވި ގޮތުގައި ރާއްޖޭގެ މިނިވަންކަމަށް އަސަރު ކުރާ ވަރުގެ ކަންކަން ހިނގުމުން ކުރީގެ ރައީސް އަބްދުﷲ ޔާމީނަށް ވުރެ މި ސަރުކާރުގެ ކަންކަން ގޯސްވެގެން ގޮސްފައިވާ ކަމަށެވެ. އެހެންވެ ރައީސް ސޯލިހަށް ދެވަނަ ދައުރެއް ދޭންވީ ސަބަބެއް ނެތް ކަމަށް އޭނާ ވިދާޅުވި އެވެ.
"ދިވެހި ގައުމުގެ މިނިވަންކަން ބާއްވަން ޖެހޭ، އެއް ގޮތަކަށް ވެސް، މިހާރު ހުރި ރައީސަށް ވޯޓު ލައިފިއްޔާ، އޭނާ ހޮވައިފިއްޔާ، މިނިވަންކަމެއް ނޯންނާނެ، އަޅުގަނޑު ޔަގީންކަމާ އެކު މި ދަންނަވަނީ." ގާސިމް ވިދާޅުވި އެވެ.