މުއިއްޒު ހޯމަ ދުވަހު އައްޑު އަށް

އިދިކޮޅު ކޯލިޝަންގެ ރިޔާސީ ކެންޑުޑޭޓް ޑރ. މުހައްމަދު މުއިއްޒު ކެމްޕޭނަށް ހޯމަ ދުވަހު އައްޑު އަށް ވަޑައިގަންނަވާ ގޮތަށް ހަމަޖެހިއްޖެ އެވެ.

ޕީޕީއެމް/ޕީއެންސީން ބުނީ މުއިއްޒު އައްޑު އަށް ވަޑައިގަންނަވާނީ އެ ދުވަހުގެ ހަވީރު 4:00 ގައި ކަމަށެވެ. އެހެންވެ އެއާޕޯޓުން ހޫނު މަރުހަބާއެއް ކިޔަން މިހާރު ވެސް އަންނަނީ ތައްޔާރީތައްވަމުންނެވެ. މުއިއްޒުގެ ރަނިންމޭޓް ފަރެސްމާތޮޑާ ދާއިރާގެ މަޖިލިސް މެންބަރު ހުސައިން މުހައްމަދު ލަތީފު (ސެމްބެ) މިރޭ އައްޑު އަށް ވަޑައިގަންނަވާ ގޮތަށް ހަމަޖެހިފައިވެ އެވެ.

މުއިއްޒު ހޯމަ ދުވަހު އައްޑު އަށް ވަޑައިގަންނަވާ އިރު، މިއީ އަންނަ މަހުގެ 9 ގައި ބާއްވާ ރިޔާސީ އިންތިހާބުގައި ވާދަކުރައްވާ ކެންޑިޑޭޓުންގެ ތެރެއިން އައްޑު އަށް ވަޑައިގަންނަވާ ދެވަނަ ކެންޑިޑޭޓެވެ.

އިން އިންތިހާބުގައި ވާދަކުރައްވާ 8 ކެންޑިޑޭޓުންގެ ނަން އިލެކްޝަން ކޮމިޝަން (އީސީ) އިން ތަރުތީބުކުރި ފަހުން، ކެމްޕޭނަށް އައްޑު އަށް ފުރަތަމަ ވަޑައިގެންނެވީ ދަ ޑިމޮކްރެޓްސްގެ ކެންޑިޑޭޓް އަދި ހުޅުދޫ ދާއިރާގެ މަޖިލިސް މެމްބަރު އިލްޔާސް ލަބީބެވެ. އޭނަ އައްޑު އަށް ވަޑައިގެންނެވީ މިދިޔަ މަހުގެ 29 ގަ އެވެ.

މާދަމާ ރޭ ހުޅުމާލޭގައި މުއިއްޒުގެ މެނިފެސްޓޯ ލޯންޗްކުރާނެ އެވެ.