އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު އައްޑު އަށް ފައްޓަވާ ކެމްޕޭން ދަތުރުގެ ތެރެއިން ހިތަދޫގައި މިރޭ ޖަލްސާއެއް ބާއްވަން ބާއްވަން ނިންމައިފި އެވެ.
މި ޖަލްސާ އޮންނާނީ ހިތަދޫގެ ޕީޕީއެމްގެ މައި ޖަގަހައިގައި މިރޭ 8:30 ގަ އެވެ،
މުއިއްޒު އައްޑު އަށް ވަޑައިގަންނަވަން ހަމަޖެހިފައި ވަނީ ހަވީރު އެވެ. އެހެންވެ އެއާޕޯޓުން ހޫނު މަރުހަބާއެއް ކިޔަން ޕީޕީއެމް/ޕީއެންސީގެ އައްޑޫ ސަޕޯޓަރުން ހަވީރު 4:00 ގަން އެއާޕޯޓަށް ދާން ދައުވަތު ދީފައިވެ އެވެ. އަދި އެކަމުގެ ތައްޔާރީތައް މިހާރު އަންނަނީ ވަމުންނެވެ.
މުއިއްޒު އައްޑު އަށް ކުރައްވާ ކެމްޕޭން ދަތުރުގެ ތެރޭގައި އައްޑޫގެ ހުރިހާ އަވަށަކަށް ވެސް ވަކިވަކިން ވަޑައިގެން ސަޕޯޓަރުންނާ ބައްދަލުކުރައްވަން ހަމަޖެހިފައިވެ އެވެ. އެގޮތުން މާދަމާ ހަވީރު ހުޅުދޫގައި ވެސް ޖަލްސާއެއް ބާއްވަން ހަމަޖެހިފައިވެ އެވެ.
އައްޑޫ ދަތުރު ނިންމަވާލައްވައި މުއިއްޒު ފުރާވަޑައިގަންނަވާނީ މާދަމާ ރޭގަ އެވެ.
އޭނަ މިއަދު އައްޑު އަށް ވަޑައިގަންނަވާ އިރު ރަނިންމޭޓް ހުސައިން މުހައްމަދު ލަތީފު (ސެމްބެ) ހުންނެވީ އައްޑޫގަ އެވެ. އޭނަ އައްޑު އަށް ވަޑައިގަތީ މިދިޔަ ހޮނިހިރު ދުވަހުގެ ރެ އެވެ. މުއިއްޒުގެ މެނިފެސްޓޯ ރޭ ވަނީ ހުޅުމާލޭގައި ލޯންޗްކޮށްފަ އެވެ.
މުއިއްޒު އަކީ ރިޔާސީ އިންތިހާބުގައި ވާދަކުރައްވާ 8 ކެންޑިޑޭޓުންގެ ތެރެއިން ކެމްޕޭނަށް އައްޑު އަށް ވަޑައިގަންނަވާ ދެވަނަ ކެންޑިޑޭޓެވެ. ކެމްޕޭނަށް ފުރަތަމަ އައްޑު އަށް ވަޑައިގެންނެވީ ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބެވެ. އެއީ މިދިޔަ މަހިގެ ފަހުކޮޅު އެވެ.
ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.