ޖަމިއްޔާތަކުން ސިޔާސީ މަސައްކަތް ނުކުރުމަށް ހޯމް މިނިސްޓަރު އިމްރާން އަބްދުﷲ ގޮވާލައްވައިފި އެވެ.
މި އަހަރުގެ ރިޔާސީ އިންތިހާބުގައި ވާދަކުރައްވާ ޑރ. މުހައްމަދު މުއިއްޒަކީ ސަލަފު ޖަމިއްޔާގެ ކެންޑިޑޭޓްގެ ގޮތުގައި އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހު ކެމްޕޭން ތަރުޖަމާނު މާރިޔާ އަހުމަދުދީދީ ތަކުރާރުކޮށް ސިފަކުރައްވަމުން ގެންދަވާ އިރު، އެކަމާ ގުޅުވައި އިމްރާން ކުރެއްވި ޓްވީޓެއްގައި ވިދާޅުވީ ޖަމިއްޔާތަކުން ކުރަން ވާނީ ޖަމިއްޔާތަކުން ކުރަން ގާނޫނުގައި ކަނޑައެޅިފައިވާ ކަންކަން ކަމަށެވެ.
މި ރާއްޖެ ހިންގުމަށް މިވަގުތު ކަނޑައެޅިފައިވާ ނިޒާމުގައި ސިޔާސީ މަސައްކަތް ކުރާނީ ސިޔާސީ ޕާޓީތަކުން.
ޖަމްޢިއްޔާތަކުން ކުރަންވާނީ ޖަމްޢިއްޔާތަކުން ކުރުމަށް ކަނޑައެޅިފައިވާ ކަން ކަން.
— Imran Abdulla (@ShimranAb) August 20, 2023
"މި ރާއްޖެ ހިންގުމަށް މި ވަގުތު ކަނޑައެޅިފައިވާ ނިޒާމުގައި ސިޔާސީ މަސައްކަތް ކުރާނީ ސިޔާސީ ޕާޓީތަކުން." މިނިސްޓަރު ވިދާޅުވި އެވެ.
އިމްރާނަކީ އެމްޑީޕީ ކޯލިޝަންގައި ހިމެނޭ އަދާލަތު ޕާޓީގެ ރައީސެވެ.
އިދިކޮޅު ކޯލިޝަން ޕީޕީއެމް/ޕީއެންސީގެ ކެންޑިޑޭޓް މުއިއްޒަކީ ސަލަފުގެ ކެންޑިޑޭޓްގެ ގޮތުގައި މާރިޔާ ސިފަކުރައްވާތީ އެ ޖަމިއްޔާ އަށް ނިސްބަތްވާ ބައެއް މީހުން އެކަމާ ނުރުހުން ފާޅުކޮށް ރައްދު ވެސް ދީފައިވ އެވެ.