ރާއްޖޭގެ ޓޫރިޒަމް ދާއިރާ އަށް ހާއްސަކޮށްގެން ޑީޖޭ އިން ތަމްރީނުކުރަން ޓޫރިޒަމް މިނިސްޓްރީން ކުންފުންޏަކާ އެކީ އެއްބަސްވުމެއްގައި ސޮއިކޮށްފި އެވެ.
މި އެއްބަސްވުން ހެދީ ރާއްޖޭގެ މަޝްހޫރު ޑީޖޭއެއް ކަމަށްވާ އުމަރު ޒިޔާދުގެ އޫބާ އިވެންޓާ އެކީގަ އެވެ. މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ޓޫރިޒަމް މިނިސްޓަރު ޑރ. އަބްދުﷲ މައުސޫމެވެ. އޫބާގެ ފަރާތުން ސޮއިކުރީ ޑިރެކްޓަރު އުމަރެވެ.
މައުސޫމް ވިދާޅުވީ ޑީޖޭއިންގެ ގޮތުގައި މަސައްކަތް ކުރުމަކީ ދިވެހި ޒުވާނުން ވަރަށް ޝައުގުވެރިކަމާ އެކު ކުރާ ކަމެއްކަން ފާހަގަކުރެވޭ ކަމަށެވެ. އެހެންވެ ޑީޖޭ އިން ތަމްރީނުކުރަން ހިންގާ ޕްރޮގްރާނމްގެ ސަބަބުން އެފަދަ ޒުވާނުންނަށް ކުރިއަށްދާން ފުރުސަތު ފަހިވެގެން ދާނެ ކަމަށް ވިދާޅުވި އެވެ.
"އުންމީދަކީ މި ޕްރޮގްރާމްގެ ތެރެއިން އިރާދަކުރެއްވިއްޔާ އަންނަ މަހުގެ ފަހުކޮޅުގައި ފެށިގެން ގެންދާ ޕްރޮގްރާމް ނިންމާލާފައި އިރާދަކުރެއްވިއްޔާ ސީޒަން އަންނަންވާ އިރަށް މިހާރު ޑީޖޭގައި އުޅޭ ކުދިންނާއި އައު ކުދިންވެސް އިންޑަސްޓްރީއަށް ހިދުމަތް ދިނުމަށް މުޅިން ރެޑީ ކުރެވޭނެކަމަށް،" މިނިސްޓަރު ވިދާޅުވި އެވެ. "ރާއްޖޭގައި ޑީޖޭ ޝޯޓޭޖެއް އެބައޮތް. އެކަމަށް ކޮންމެވެސް ކަހަލަ މަގެއް ފަހިވެގެންދާނެ ކަމެއްކަމަށް މި ބެލެވެނީ.”
އޫބާ އިން ޕްރޮގްރާމް ނިމޭ އިރު ޖީޑޭއެއްގެ ގޮތުގައި މަސައްކަތްކުރުމަށް ބޭނުންވާ އަސާސީ ތަމްރީންތަކާއި މައުލޫމާތުތައް ބައިވެރިންނަށް ލިބިގެން ދާނެ ކަމަށެވެ. ޕްރޮހްރާމްގައި ވިއްސަކަށް ޒުވާނުންނަށް ފުރުސަތު ދޭން ނިންމާފައިވާ އިރު، އިސްކަން ދޭނީ އިންޑަސްޓްރީއަށް ހިދުމަތްދޭ މީހުންނަށް ކމަށް ބުންޏެވެ. އިސްކަން ދިނުމަށްކަމަށްވެސް އުމަރު ވިދާޅުވިއެވެ.
ޑީޖޭ އިން ތަމްރީނުކުރާ ފުރަތަމަ ބުރު ކުރިއަށް ގެންދަން ނިންމާފައި ވަނީ އަންނަ މަހުގެ 24 އިން އޮކްޓޯބަތު 6 އަށެވެ.
"އަޅުގަނޑުމެން މިކަން މި ކުރަނީ މެލޭޝިއާގެ ޑީޖޭސް ޕްލޭގްރައުންޑް ކިޔާ ސްކޫލަކާ ގުޅިގެން. ޕައިނިއާސް ސެޓިފައިޑް ސެޓްފިކެޓެއް މި ކޯސް ނިމުނީމަ މި ލިބެނީ.” އުމަރު ވިދާޅުވިއެ ވެ.
ޓޫރިޒަމް މިނިސްޓްރީން ޕްރޮގްރާމްގައި ބައިވެރިން މާދަމާ ހުޅުވާލާނެ ކަމަށެވެ. މިއީ އެއްވެސް ފީއަކާ ނުލައި ހިލޭ ބައިވެރިވެވޭނެ ޕްރޮގްރާމެކެވެ.
ޑީޖޭއިންނަކީ ރާއްޖޭގެ ރިސޯޓްތަކުގެ މިއުޒިކްގައި އެންމެ ނަގާކިޔާ މީހުންނެވެ. އެކަމަކު މިކަމުގައި އުޅޭ ދިވެހިން މަދެވެ.