އިދިކޮޅު ކޯލިޝަންހެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ހަވީރު އައްޑު އަށް ވަޑައިގަތުމާ ގުޅިގެން ގަން އެއާޕޯޓުން ހޫނު މަރުހަބާއެއް ކިޔައިފި އެވެ.
ގިނަ އަދަދެއްގެ ބަޔަކު އެއާޕޯޓަށް ޖަމާވެފައިވާ އިރު ސަލާންކުރަން ދިގު ކިއޫތަކެއް ހަދާފައިވެ އެވެ. މުއިއްޒާ އެކީ ޕީޕީއެމް/ޕީއެންސީގެ އިސްވެރިންތަކެއް އައްޑު އަށް ވަޑައިގެންނެވި އެވެ.
ކެމްޕޭނަށް މިއަދު އައްޑު އަށް ފެއްޓެވި ދަތުރުގެ ތެރެއިން މުއިއްޒު އެންމެ ފުރަތަމަ ވަޑައިގަތުމަށް ހަމަޖެހިފައި ފޭދުއަށެވެ. އެގޮތުން ޕީޕީއެމްގެ ފޭދޫ އޮފީހުގައި ޕާޓީގެ މެމްބަރުންނާ ބައްދަލުކުރައްވާނެ އެވެ. މުއިއްޒު އައްޑު އަށް ކުރައްވާ ކެމްޕޭން ދަތުރުގެ ތެރޭގައި އައްޑޫގެ ހުރިހާ އަވަށަކަށް ވެސް ވަކިވަކިން ވަޑައިގެން ސަޕޯޓަރުންނާ ބައްދަލުކުރައްވަން ހަމަޖެހިފައިވެ އެވެ.
އެގޮތުން މިރޭ ހިތަދޫގައި އަދި މާދަމާ ހަވީރު ހުޅުދޫގައި ޖަލްސާއެއް ބާއްވަން ހަމަޖެހިފައިވެ އެވެ.
މުއިއްޒު އައްޑު އަށް ވަޑައިގަންނަވާ އިރު ރަނިންމޭޓް ހުސައިން މުހައްމަދު ލަތީފު (ސެމްބެ) ހުންނެވީ އައްޑޫގަ އެވެ. އޭނަ އައްޑު އަށް ވަޑައިގަތީ މިދިޔަ ހޮނިހިރު ދުވަހުގެ ރެ އެވެ.
މުއިއްޒު އަކީ ރިޔާސީ އިންތިހާބުގައި ވާދަކުރައްވާ 8 ކެންޑިޑޭޓުންގެ ތެރެއިން ކެމްޕޭނަށް އައްޑު އަށް ވަޑައިގަންނަވާ ދެވަނަ ކެންޑިޑޭޓެވެ. ކެމްޕޭނަށް ފުރަތަމަ އައްޑު އަށް ވަޑައިގެންނެވީ ދަ ޑިމޮކްރެޓްސްގެ ކެންޑިޑޭޓް އިލްޔާސް ލަބީބެވެ. އެއީ މިދިޔަ މަހިގެ ފަހުކޮޅު އެވެ.
ރިޔާސީ އިންތިހާބު އޮންނާނީ އަންނަ މަހުގެ 9 ގަ އެވެ.