އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު ކުރައްވާނީ ރައީސް އަބްދުﷲ ޔާމީން ކުރެއްވި ފަދަ ގޯސް ވެރިކަމެއް ކަމަށް އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހުގެ ކެމްޕޭން ތަރުޖަމާނު މާރިޔާ އަހުމަދުދީދީ ވިދާޅުވެއްޖެ އެވެ.
މިއަދު ބޭއްވި ނޫސް ކޮންފަރެންސެއްގައި އޭނަ ވިދާޅުވީ ކިރިޔާ ވެސް ފުރުސަތަކުން މުއިއްޒަށް ވެރިކަން ލިބިއްޖެ ނަމަ ކުރީގެ ވެރިކަން އިޔާދަވާނެ ކަމަށާއި އެކަން އެގޮތަށް ވެއްޖެ ނަމަ މުއިއްޒު ވެރިކަން ކުރައްވާނީ ޔާމީންގެ ކުރެއްވިހާ ގޯސްކޮށް ކަމަށް ވިދާޅުވި އެވެ.
"އަޅުގަނޑަށް ފެންނަނީ އެ ބޭފުޅާ ކުރައްވާނީ ޔާމީންް ކުރެއްވި ވެރިކަން،" ޑިފެންސް މިނިސްޓަރުކަން ވެސް ކުރައްވާ މާރިޔާ ވިދާޅުވި އެވެ. "އެކަމަކު ޔާމީނަށްވުރެ ވެސް ހަރުކަށިކޮށް. މިހާރު ވެސް ދައްކަމުން އެ ގެންދަނީ ގާނޫނުތައް ފާސްކުރުމުގެ ވާހަކަތައް."
އޭނަ ވިދާޅުވޮ ގޮތުގައި އެންމެ ބޮޑުު އިދިކޮޅު ޕާޓީއަކީ ޕީޕީއެމް ކަމަށް ވިޔަސް މުއިއްޒު އުޅުއްވަނީ ޕީއެންސީ ބޮޑުކުރަން ކަމަށެވެ.
"އެބޭފުޅާއާ ޔާމީނާ އެއީ ހަމަ އެކައްޗެއް އެއްގޮތަކުން ބަލާއިރު އެ ޔަގީން ކޮށްދެއްވަނީ ތި މަންނައަށް ޔާމީން ބުނާ ގޮތަކަށް ވެރިކަމެއް ނުކުރާނަމޭ،" މާރިއާ ވިދާޅުވި އެވެ. "އެކަމަކު ޔާމީނަށް ފުރުސަތު ދޭނަމޭ ފާޑު ވިދާޅުވާން. އެ ދެބޭފުޅުން ދޭތެރޭގައި މައްސަލައެއް ނުޖެހެންޏާ ތިބޭފުޅުން ޔަގީން ކުރައްވާ އެ ވާނީ ދެހާސް ތޭރަ އިން ދެހާސް އަށާރައިގައި އެ އޮތް ވެރިކަމަށް." މާރިޔާ ވިދާޅުވި އެވެ.
މުއިއްޒަށް ބަހުގެ ހަމަލާތައް ދެއްވަމުން މާރިޔާ ވިދާޅުވީ މުއިއްޒު މިހާރުން ފެށިގެން ޔާމީންގެ ސިޔާސީ ހަޔާތް ކަފުން ކުރުމުގެ މަސައްކަތް ފަށާފައިވާ ކަމަށެވެ.