ސްކޫލްތަކުގެ ދަރިވަރުން ޓޫރިޒަމް ދާއިރާ އަށް ހޭލުންތެރި ކުރަން ޓޫރިޒަމް މިނިސްޓްރީން ފަށާފައިވާ ޕްރޮގްރާމް އައްޑޫގެ ސްކޫލްތަކުގައި ވެސް ފަށައިފި އެވެ.
މީގެ ދަށުން އެންމެ ފުރަތަމަ ސެޝަން ބޭއްވީ ފޭދޫ ސްކޫލްގަ އެވެ. އެ ސެޝަންގައި ސްކޫލްގައި ސާނަވީ އަށް ކިޔަވާ 101 ދަރިވަރަކު ބައިވެރިވެ އެވެ. އެ ސެޝަންގައި ދަރިވަރުންނަށް މައުލޫމާތު ދެއްވީ ޓޫރިޒަމް މިނިސްޓްރީގެ ލީގަލް އޮފިސަރު އިޝާރާ އަބްދުލް އަޒީޒާއި އައްޑޫ ގަމުގައި ހިންގަމުން އަންނަ އީކްއޭޓަ ވިލެޖްގެ ރިސޯޓް މެނޭޖަރު މުހައްމަދު ވަހީދެވެ.
ޓޫރިޒަމް އެވެއާނެސް ޕްރޮގްރާމްގެ ތެރެއިން އައްޑޫގެ ދެވަނަ ސެޝަން އިއްޔެ ބޭއްވީ ހިތަދޫ ސްކޫލްގަ އެވެ. އެ ސެޝަންގައި އެ ސްކޫލްގެ 230 ދަރިވަރަކު ބައިވެރިވި އެވެ. ސެޝަންގައި މައުލޫމާތު ދެއްވީ ވަހީދާއި ޓޫރިޒަމް މިނިސްޓްރީގެ ޕާމަނަންޓް ސެކްރެޓަރީ ފާތިމަތު ނިލްފާ އެވެ.
ރާއްޖޭގެ އެކި ހިސާބުތަކުގެ ސްކޫލްތަކުގައި މިދިޔަ މަހުގެ ފަހުކޮޅުން ފެށިގެން ޓޫރިޒަމް މިނިސްޓްރީން ޓޫރިޒަމް ދާއިރާ އަށް ދަރިވަރުން ހޭލުންތެރިކުރަމުންނެވެ.
މި ދާއިރާ އަކީ ރާއްޖޭގެ އިގުތިސާދު ބިނާވެފައި އޮތް މައި ސިނާއަތެވެ. އެހެންވެ ކުރިމަގުގެ މި ދާއިރާ އަށް ޝައުގުވެރިކަން އުފައްދަން ސަރުކާރުން އަންނަނީ ތަފާތު ޕްރޮގްރާމްތައް ޓޫރިޒަމް ދާއިރާގެ އެކި ފަރާތްތަކާ ގުޅިގެން ހިންގަމުންނެވެ. މިނިސްޓްރީން ބުނީ މިހާރު ކުރިއަށް ގެންދާ ޕްރޮގްރާމްގެ މައިގަނޑު އަމާޒަކީ ރާއްޖޭގެ އިގުތިސާދު އެ ދާއިރާއަކަށް ބިނާވެފައި އޮތް ޓޫރިޒަމް ދާއިރާގެ މައުލޫމާތު ވީހާ ފުޅާކޮށް ހިއްސާކޮށް، ސްކޫލް ނިންމައި ދަރިވަރުން ވަޒީފާގެ މައިދާނަށް ނުކުންނަން ތައްޔާރުވާ އިރު، ޓޫރިޒަމް ދށއިާ އަށް ލޯބި ޖައްސައި، އެ ދާއިރާ އިން ކުރިއަށްދާން ވެސް ހިތްވަރު ދިނުމެވެ.