ރިޔާސީ އިންތިހާބުގެ ސަލާމަތީ ކަންކަމަށް އެކި ރަށްރަށުގައި ފުލުހުން މަސައްކަތްކުރި ނަމަވެސް އެއްވެސް ފުލުހެއްގެ ވޯޓްލުމުގެ ހައްގު ނުގެއްލޭނެ ކަމަށް ފުލުހުންގެ އިދާރާ އިން ބުނެފި އެވެ.
ވޯޓާ ދިމާކޮށް ފުލުހުން އެކި ރަށްރަށަށް ފޮނުވާތީ އެއީ ފުލުހުންނަށް ވޯޓްލުމުގެ ފުރުސަތު ގެއްލިދާނެ ކަމެއް ކަމަށް ބުނެ ބައެއް ސިޔާސީ ޕާޓީތަކުން ވާހަކަ ދައްކަމުން ދާތީ ފުލުހުން ރޭ ނެރުނު ބަޔާނެއްގައި ބުނީ އިންތިހާބާ ގުޅިގެން ކުރިއަށް ގެންދާ އޮޕަރޭޝަނަކީ ވަކިވަކި ފުލުހުން ދާން ޖެހޭ ތަންތަން ދުރާލައި ކަނޑައަޅާފައިވާ ތަންތަން ކަމަށެވެ.
އެހެންވެ އެ ފުލުހުން ތިބޭ ތަނެއްގައި ވޯޓްލާން ރީ-ރަޖިސްޓްރީކުރެވިފައިވާތީ ވޯޓްލުމުން އެއްވެސް ފުލުހަކު މަހުރޫމު ނުވާނެ ކަމަށް ފުލުހުންގެ އިދާރާ އިން ބުންޏެވެ.
"އެހެންކަމުން އޮޕަރޭޝަންގައި ޑިޕްލޯއިކޮށްފައިވާ ތަނެއްގެ ސަބަބުން އެއްވެސް ފުލުހެއްގެ ވޯޓްލުމުގެ ހައްގު ގެއްލިގެން ނުދާނެ." ފުލުހުންގެ ބަޔާނުގައިވެ އެވެ.
އިންތިހާބުގެ ސަލާމަތީ ކަންކަމަށް ރާއްޖޭގެ އުތިރާއި ދެކުނުނަށް ފުލުހުން ޑިޕްލޯއިކޮށްފައިވެ އެވެ.
ރިޔާސީ އިންތިހާބުގެ ސަލާމަތީ ކަންކަން ކަށަވަރުކޮށް ބެލެހެއްޓުމަށް ފުލުހުން ދުރާލައި ތައްޔާރީތައް ވެފައިވާ އިރު، އިންތިހާބާ ގުޅިގެން ކުރިއަށް ގެންދާ އޮޕަރޭޝަންގެ ކޮމާންޑަރަކަށް ހަމަޖައްސާފައި ވަނީ ޗީފް ސުޕްރިންޓެންޑެންޓް އޮފް ޕޮލިސް އަހުމަދު ޝާކިރެވެ. ޑެޕިއުޓީ ކޮމާންޑަރަކަށް ހަމަޖައްސާފައި ވަނީ ސުޕްރިންޓެންޑެންޓް އޮފް ޕޮލިސް އަޙްމަދު މުސްލިމެވެ.
ރިޔާސީ އިންތިހާބު އޮންނާނީ އަންނަ ހަފުތާގެ ހޮނިހިރު ދުވަހު އެވެ.