އިދިކޮޅު ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ރިޔާސީ ޓިކެޓަކީ ވަގަށް ހޯއްދެވި އެއްޗެއް ކަމަށް އަދާލަތު ޕާޓީގެ ރައީސް އިމްރާން އަބްދުﷲ ވިދާޅުވެއްޖެ އެވެ.
އެމްޑީޕީން ރޭ މާލޭގައި ބޭއްވި ޖަލްސާގައި މުއިއްޒަށް ވަރަށް ބޮޑަށް ފާޑު ވިދާޅުވެ، ވާހަކަ ދައްކަވަމުން ހޯމް މިނިސްޓަރު ވަނީ "ވަގަށް ޓިކެޓް ނެންގެވި ބޭފުޅަކަށް ވެރިކަމަށް ވަޑައިގެންނެވިދާނެތޯ" ވެސް ސުވާލު ކުރައްވައިފަ އެވެ. އިމްރާން ވިދާޅުވި ގޮތުގައި ޔާމީން މިހާރު ތަންފީޒު ކުރައްވަމުން ގެންދަވާ 11 އަހަރުގެ ޖަލު ހުކުމާ މެދު އެންމެ ބޮޑަށް އުފާކުރައްވާ ބޭފުޅަކީ ވެސް މުއިއްޒެވެ. އަދި ޔާމީނަށް ހުކުމް ކުރި ދުވަހު ވެސް މާލޭގެ މޭޔަރަކަށް މިހާރު ހުންނެވި މުއިއްޒު ވަރަށް އުފަލުން އުޅުއްވި ކަމަށް އިމްރާން ވިދާޅުވި އެވެ.
"ދައުރު ނިމެއްޖެ ޔާމީން ޖަލަށް ވަދެއްޖެ. މުއިއްޒު ހުރީ ވެރިކަމަށް ފައްކާވެފައި. ހިތުގެ އަޑިން ކިޔާލަ ކިޔާލާ އޮތީ ޔާމީނުގެ ޖަލުގައި ލައްވާންދޭވެ. ކޯޓަށް ވަޑައިގެން އެތާ އިން އިރު ވެސް މީނަގެ ހިތުގައި އޮތީ ގާޒީ ހުކުމް ކުރައްވާންދޭ، މީނަ [ޔާމީން] ޖަލުގައި އޮވޭތޯ. ޔާމީނަށް ކުރިމަތި ނުލެވޭ ގޮތަށް ގާޒީ ހުކުމްކޮށްފި،" އޭނަ ވިދާޅުވި އެވެ. "މުއިއްޒު އުފަލަކުން ހެޔެއް ނެތް. ޓިކެޓުގެ ކަންތައް ދިޔަ ގޮތުން އަޅުގަނޑެއް ނޫން އެހެން ބުނަނީ. އެ ބޭފުޅުން ވިދާވީ ޓިކެޓް ނެގީ ވަގަށޭ. ތިބޭފުޅުން ބައްލަވާ ވަގަށް ޓިކެޓް ނެގި މީހަކު ރައީސަކަށް ހޮވޭނެތޯ؟"
އިމްރާން ވިދާޅުވީ މިކަމާ ހެދި ޕީޕީއެމް/ޕީއެންސީގައި އިސްކޮށް އުޅުއްވާ ބޭފުޅޫން ކެމްޕޭނަށް ވަޑައިގަންނަވާ އިރު ވެސް މޫނުމަތިން ހިނިތުންވުމެއް ވެސް ނުފެންނަ ކަމަށެވެ.
"އެންމެން ތިބީ [މުއިއްޒާ] ދެކޮޅަށް." އޭނަ ވިދާޅުވި އެވެ.
އިމްރާން ވިދާޅުވި ގޮތުގައި މުއިއްޒުގެ ސިޔާސީ ވަރަ ފެޅީ އަދާލަތު ޕާޓީގެ ހާލީގައި ކައިބޮއިގެން ކަމަށެވެ. އަދި އެ ދުވަސްވަރުގެ ގޮތުން ކުރަން ޖެހުނު ކަންކަން ކުރައްވަމުން ގެންދެވި އިރު މުއިއްޒު ހުންނެވި ކޮންމެ ކަމަކާ ވެސް ދެކޮޅަށް ކަމަށާއި، އެކަމަށް އަދާލަތު ޕާޓީގެ މެންބަރުން ހެކިވާނެ ކަމަށެވެ.
މުއިއްޒަށް "ޖޯކް ޖައްސަވައި" އިމްރާން ވިދާޅުވީ ވެރިކަން ބަދަލުވެގެން މަގާމުތައް ބަހަން ޖެހުނު ވަގުތުގައި ކުޑަކުއްޖަކު މަންމަ ކައިރީގައި ރޯހެން ވަޒީފާއެއް ދޭން އެދިވަޑައިގެން މުއިއްޒު ރުއި ކަމަށެވެ. އަދި ވަޒީފާ ދިނީ މަންމަގެ ލަނގޮޑި އަށް ކެތްނުވާ ފަދައިން އޭނާގެ ލަގޮނޑިއަށް ކެތްނުވެގެން ކަމަށް ެސް އިމްރާން ވިދާޅުވި އެވެ.
އޭގެ ފަހުން ޔާމީންގެ ވެރިކަމަށް ވަޑައިގެން ހައުސިން މިނިސްޓަރުގެ ސްލޮޓް އެމްޑީއޭ އަށް ދިނުމުން އެ ޕާޓީގެ ލީޑަރު އަހުމަދު ސިޔާމު މުހައްމަދުގެ ގާތަށް މުއިއްޒު ވަޑައިގެން ދޮރު ކައިރީގައި ގޮނޑި އަޅައިގެން އިނދެ މަގާމު ދެއްވާތޯ އާދޭސްކުރެއްވި ކަމަށް ވެސް އިމްރާން ވިދާޅުވި އެވެ. އަދި ސިޔާމުގެ ލަނގޮޑި އަށް ކެތްނުވެގެން މަގާމު ދިން ކަމަށާއި، އަދާލަތު ދޫކޮށްލާފައި ވަޑައިގެންނެވި އިރު ދޮންކަޅު ވެސް އަންގައި ނުލާ ކަމަށް ވިދާޅުވި އެވެ.