ރިޔާސީ އިންތިހާބުގެ ސަލާމަތީ ކަންކަން ބަލަހައްޓަން ފުލުހުން މަސައްކަރްކުރާ އިރު، ބޮޑީވޯން ކެމެރާ ވެސް ބޭނުންކުރާނެ ކަމަށް ބުނެފި އެވެ.
އަންނަ ހޮނިހިރު ދުވަހު ބާއްވާ އިންތިހާބާ ދިމާކޮށް "އޮޕަރޭޝަންސް ބުލޫ ވޭވް" ގެ ނަމުގައި ފުލުހުން ހިންގަން ހަމަޖެހިފައިވާ އޮޕަރޭޝަނާ ބެހޭ މައުލޫމާތު އިއްޔެ ނޫސްވެރިންނާ ހިއްސާކުރައްވައި އިންތިހާބުގެ ކަންކަން ބަލަހައްޓަވާ ޑެޕިއުޓީ ކޮމާންޑަރު ޗީފް ސުޕްރިންޓެންޑް އަހުމަދު މުސްލިމް ވިދާޅުވީ އިންތިހާބުގެ ސެކިއުރިޓީ ކަންކަން ބެލެހެއްޓުމަށްޓަކައި ފުލުހުންނާ ހަވާލު ކުރައްވާފައިވާ މަސްއޫލިއްޔަތުތައް ވީހާ ވެސް ރަނގަޅަށް ބެލެހެއްޓުމަށް އިންތިޚާބުގެ އެންމެހާ ކަންކަން ރޭވިފައިވާ ކަމަށެވެ.
އޭނަ ވިދާޅުވީ، ބޮޑީ ވޯން ކެމެރާއާ އެކީ ފުލުހުން ވޯޓުލާ މަރުކަޒު ތެރޭގަ އާއި، ޕޯލިން ސިސްޓަމް ތަކުގަ އިވެސް ހަރަކާތްތެރިވާނެ ކަމަށެވެ. އަދި ކެމެރާ ބޭނުން ކުރާނީ ގާނޫނުތަކާއި ގަވާއިދުތަކާ އެއްގޮތަށް ކަމަށް ވިދާޅު ވިއެވެ.
ފުލުހުން ބުނީ އަމާޒަކީ އިންތިހާބު އޮންނަ ދުވަހު ވީހާ ވެސް އަމާންކަމާއި އޮމާންކަމާ އެކީ ކަންކަން ކުރިއަށް ގެންދަން ބާރު އަޅައި އެކަމަށް މަސައްކަތް ކުރުމެވެ. އަދި ފުލުހުން އިންތިހާބުގެ ސަލާމަތީ ކަންކަން ފުލުހުން ބަލަހައްޓާ އިރު، މިނިވަން އިންސާފުވެރި އިންތިހާބަކަށް ހުރަސް އެޅޭ ފަދަ އެއްވެސް މައްސަލައެއް މިހާތަނަށް ފުލުހުންނަށް ހުށަހެޅިފައި ނެތްކަމަށް މުސްލިމު ވިދާޅުވިއެވެ.
އޭނަ ވަނީ އިންތިހާބުގެ ކަންކަން އަމާންކަމާއި އޮމާންކަމާއެކު ކުރިއަށް ގެންދިއުމުގައި މުއައްސަސާތަކުން ގުޅިގެން ކުރާ މަސައްކަތުގައި ފުލުހުންގެ ފުރިހަމަ އެއްބާރުލުން އޮންނާނެ ކަމަށް ވެސް ވިދާޅުވެފަ އެވެ.
ރިޔާސީ އިންތިހާބު އޮންނާނީ އަންނަ ހޮނިހިރު ދުވަހު އެވެ.