އެންމެ ފަހުން އެމެރިކާގެ ލަސް ވެގަސްގައި ބޭއްވި ކޮންޒިއުމާ އެލެކްޓްރޯނިކްސް ފެއާގައި ސޮނީ އިން ވަނީ އެކްސްޕީރިއާ ޒެޑް ނަމަކަށް ކިޔާ ފޯނެއް ދައްކާލާފަ އެވެ. މި އެކްސްޕީރިއާ އަކީ މީގެ ކުރިން ނެރެވުނު އެކްސްޕީރިއާތަކާއި ހިލާފަށް އައިފޯން އަދި ސެމްސަންގް ގެލެކްސީ ފަދަ ފޯނު ތަކާއި ވާދަ ކުރާނެ ފޯނެކެވެ. މި ފޯނުގައި ބޭނުން ކުރާނީ އެންޑްރޮއިޑް އޯއެސް އެވެ.
ސޮނީއިން ބުނީ "5 ސްކްރީނެއް ހުންނަ މި ފޯނަކީ ވޯޓާ ޕްރޫފް ފޯނެއް ކަމަށެވެ. އަދި 1 މީޓަރު ފުން ފެން އެއްޗަކަށް މި ފޯނު ލިކަމުގައި ވިއަސް އެއްވެސް މައްސަލައެއް ނުޖެހޭނެ ކަމަށެވެ. އަދި ސޮނީއިން ބުނަނީ ކޮންމެ ދިހަ މީހަކުން އެކަކު އޮޅިގެން އޭނާގެ ފޯނު ޓޮއިލެޓްގެ ތެރެއަށް ވައްޓާލާ ކަމަށާއި، މިފަދަ ހާލަތެއްގައި ވެސް މި ފޯނަށް ގެއްލުމެއް ނުވާނެ ކަމަށެވެ. އަދި ހަޑި ވެއްޖެ ނަމަ ފެން އިސްކުރުން ފޯނު ދޮވެލެވޭނެ ކަމަށް ވެސް ބުނެފައި ވެ އެވެ.
މި ފޯނަކީ ސްނެޕް ޑްރެގަން ގެ އެސް 4 ޕްރޯ ކުއަޑް ކޯ ޕްރޮސެސާއެއް ހުންނަ ފޯނެކެވެ. އަދި އެންއެފްސީ ވެސް ސަޕޯޓް ކުރާ ޑިވައިސް އެކެވެ. މީގެ އިތުރަށް މި ފޯނުގައި 13 މެގަ ޕިކްސެލް ފާސްޓް ކެޕްޗާ ކެމެރާ އެއްވެސް ހުރެ އެވެ. ދެން އޮތީ މި ފޯނުގެ އެންމެ މޮޅު އެއް ފީޗާގެ ވާހަކަ އެވެ. އެއީ މި ފޯނުގެ ޑިސްޕްލޭ އެވެ. "5 އިންޗި މި ޑިސްޕްލޭ އަކީ ފުލް އެޗްޑީ 1080 ޕީ ޑިސްޕްލޭ އެކެވެ. އަދި މީގެ ރެޒޮލިއުށަނަކީ 1920*1080 އެވެ. މިއީ ފޯނެއްގައި މިހާރު ހުރި އިންމެ ވަރުގަދަ ޑިސްޕްލޭ އެވެ. އައިފޯން ރެޓިނާ ޑިސްޕްލޭގައި ވެސް ހުންނަނީ 640*1136 އެވެ. ސޮނީއިން ބުނަނީ މި ފޯނުގެ ޑިސްޕްލޭގައި "55 ފުލް އެޗްޑީ ފްލެޓް ސްކްރީން ޓީވީ އެއްގައި ހުންނަ ވަރަށް ޕިކްސެލް ހުންނާނެ ކަމަށެވެ.
އެ ކުންފުނީގެ އޮފިޝަލަކު ބުނެފައި ވަނީ މިއީ ސޮނީއިން މިހާތަނަށް އުފެއްދި އެންމެ މޮޅު ފޯނު ކަމަށެވެ.