ޓޫރިޒަމް ދާއިރާގެ މަސައްކަތްތެރިންގެ ހައްގުތަކަށް ވަކާލަތުކުރާ ޖަމިއްޔާ، ޓޫރިޒަމް އެސޯސިއޭޝަން އޮފް މޯލްޑިވްސް (ޓީމް) އިން ރިޔާސީ އިންތިހާބުގައި ރައީސް އިބްރާހީމް މުހައްމަދު ސޯލިހަށް ތާއީދު ކުރަން ނިންމައިފި އެވެ.
އެ ޖަމިއްޔާ އިން ނެރުނު ބަޔާނެއްގައި ބުނީ ޓޫރޒަމް ދާއިރާގެ ދާއިރާގެ މަސައްކަތްތެރީންގެ ހައްގު ހޯދައި ދިނުމަށް މި ސަރުކާރުން މުހިންމު މަސައްކަތްތަކެއް ކުރާ ކަމަށާއި ރައީސް ސޯލިހުގެ ފަސް އަހަރުގެ ދައުރުގައި މީގެ ކުރީގެ ސަރުކާރަކުން ނުކޮށްދޭ މިންވަރަށް ރިސޯޓުތަކުގެ މަސައްކަތްތެރީންގެ ހައްގުތައް ރައްކާތެރިކުރަން މަސައްކަތްކޮށް އެއްބާރުލުން ދީފައިވާކަމަށެވެ.
ޓީމުން ބުނި ގޮތުގައި ސަރުކާރުން ވަނީ އެ ދާއިރާ ކުރިއަރުވަން ބައިނަލްއަގުވާމީ ޖަމިއްޔާތަކާއި ގުޅުން ބަދަހިކޮށް ރިސޯޓުތަކުގެ މަސައްކަތްތެރީންގެ ހައްގުތައް ރައްކާތެރިކުރަން ވެސް މިހާތަނަށް ގިނަ މަސައްކަތްކޮށްފަ އެވެ.
އެގޮތުން މަސައްކަތްތެރީންގެ ބައިވެރިވުމާ އެކު މިނިމަމް ވޭޖް ކަނޑައެޅުމުގެ މުހިންމު ސިޔާސަތު ތަންފީޒުކޮށް، 10 ޕަސެންޓް ސާވިސް ޗާޖު ނެގުން ލާޒިމުކޮށް އެކަން މޮނިޓާ ކުރުމުގެ ނިޒާމު ހަރުދަނާކޮށް، ކުރިން އުސޫލެއް، ހަމައެއް ނެތި ވަޒީފާއިން ވަކިކުރުން ހުއްޓުވުމަށް ޤާނޫނު އިސްލާހުކޮށް، ރިސޯޓު މުވައްޒަފުން އެދުނު ގޮތަށް ސްކޫލު ޗުއްޓީ އަށް ވެސް ބޮޑު ބަދަލެއް ގެނެސްދީފައިވާ ކަމަށް ޓީމުން ބުންޏެވެ.
މީގެ އިތުރުން ވެސް ރިސޯޓް މުވައްޒަފުންގެ ހައްގުތައް ކަށަވަރު ކުރުމަށް ސަރުކާރުން އެތައް މަސައްކަތެއް ކޮށްފައިވާ ކަމަށް އެ ޖަމިއްޔާ އިން ބުންޏެވެ.
އެހެންވެ އަންނަ ހަފުތާގެ ހޮނިހިރު ދުވަހު ބާއްބާ ރިޔާސީ އިންތިހާބުގައި ރައީސް ސޯލީހަށް ތާއިދު ކުރަން ނިންމާފައިވަނީ ރައީސް ސޯލިހުގެ ސަރުކާރުން ޓޫރިޒަގެ ދާއިރާގައި މަސައްކަތްކުރާ ފަރާތްތަކަށް ކޮށްދީފައިވާ ގިނަ ކަންކަމުގެ އިތުރުން ކުރިއަށް އޮތް ދައުރުގައި ވެސް އެ ދާއިރާގެ މަސައްކަތްތެރީންނަށް ހާއްސަ ސިޔާސަތުތަކެއް ރައީސް ސޯލިހު ކަނޑައަޅުއްވާފައިވާތީ ކަމަށް ޓީމުން ބުންޏެވެ.