ބޮލީވުޑްގެ ބަތަލާ އަނުޝްކާ ޝަރްމާ ފުރަތަމަ ފަހަރަށް ޕްރޮޑިއުސް ކުރި ފިލްމް "އެންެއެޗް 10" ގެ ޓްރެއިލާ ލޯންޗްކޮށްފި އެވެ.
މި ފިލްމް ޕްރޮޑިއުސް ކުރުމުގެ އިތުރަށް ފިލްމުގެ އެެންމެ މުހިއްމު އެއް ރޯލް އަދާކޮށްފައި ވަނީ ވެސް ޒުވާން ބަތަލާ އެވެ.
އަނުޝްކާ އާ އެކު މި ފިލްމުގައި ބަތަލެއްގެ ގޮތުން ފެނިގެން ދާނީ "ޝައިތާން" އާއި "އުނގްލީ" ފަދަ ފިލްމަތަކުން ފެނިފައިވާ ނީލް ބޫޕަލަން އެވެ.
ކާމިޔާބު ފިލްމުތަކެއް ކުޅެފައިވާ އަނުޝްކާ ޕްރޮޑިއުސް ކުރި ފުރަތަމަ ފިލްމް "އެންއެޗް 10" ގައި ދައްކުވައި ދޭނީ ދެމަފިރިއަކު ކުރާ ރޯޑް ޓްރިޕެއްގައި ދިމާވާ އާދަޔާހިލާފު ހާދިސާތަކެކެވެ.
މި ފިލްމުގައި އަނުޝްކާގެ ގިނަ އެކްޝަން މަންޒަރުތަކެއް ފެނިގެން ދާނެ އެވެ. މި ފިލްމްގެ ޑައިރެކްޓަރަކީ ނަބްދީޕް ސިންގެވެ.
އަދިތިޔާ ޗޯޕްޅާގެ "ރަބް ނެ ބަނާދީ ޖޯޅީ" އިން 2008 ގައި ބޮލީވުޑަށް ނިކުތް އަނުޝްކާ އާ އެކު "އެންއެޗް 10" ޕްރޮޑިއުސްކޮށްފައި ވަނީ ބޮލީވުޑްގެ ވަރަށް ފާހަގަކޮށްލެވޭ ފަރާތްތަކެކެވެ.
އޭގެ ތެރޭގައި ޑައިރެކްޓަރު އަނޫރާގް ކެޝަޕް، "ކްއީން" ގެ ޑައިރެކްޓަރު ވިކާސް ބާލް އަދި "ލުޓޭރާ" ގެ ޑައިރެކްޓަރު އަދިތިޔަ މޮޓްވާނޭ ހިމެނެ އެވެ.
"އެންއެޗް 10" ސިނަމާތަކަށް އަންނާނީ މާޗް ގަ އެވެ.
މި އަހަރުގެ ތެރޭގައި އަނުޝްކާގެ އިތުރު ދެ ފިލްމެއް ވެސް ބެލުންތެރިންނާ ހަމައަށް އަންނާނެ އެވެ.
އެއީ އަނުރާގް ޑައިރެކްޓްކޮށްފައިވާ "ބޮމްބޭ ވެލްވެޓް" އާއި ޒޯޔާ އަހްތަރުގެ "ދިލް ދަޅަކް ނޭ ދޯ" އެވެ.
އަނުޝްކާ އެންމެ ފަހުން ފެނުނީ މިދިޔަ އަހަރުގެ އެންމެ ކާމިޔާބު ފިލްމް "ޕީކޭ" އިންނެވެ.