އަމިއްލަ ވެރިކަމެއްގެ ފަސް އަހަރުގެ ދައުރު ހަމަވާ އިރު، ގަން އިންޓަނޭޝަނަލް އެއާޕޯޓަށް ދުވާލަކު ތިން ހަތަރު އިންޓަނޭޝަނަލް ފްލައިޓް ޖައްސާ ތަން އައްޑޫ ރައްޔިތުންނަށް ފެންނާނެ ކަމަށް ޖުމްހޫރީ ޕާޓީ (ޖޭޕީ) ގެ ރިޔާސީ ކެންޑިޑޭޓް ގާސިމު އިބްރާހީމް ވިދާޅުވެއްޖެ އެވެ.
ކެމްޕޭނަށް ރޭ އައްޑު އަށް ވަޑައިގެން ހިތަދޫގައި ބޭއްވި ޖަލްސާގައި އޭނަ ވިދާޅުވީ އައްޑޫގެ އިގުސާތީ ހާލަތު ރަނގަޅު ކުރުމަށްޓަކައި ޝަންގްރިއްލާ ވިލިގިލި ރިސޯޓާއި ކެނަރީފު ރިސޯޓް ފުލް އޮޕަރޭޝަނަށް ގެންނަން ޖެހޭ ކަމަށެވެ. އެގޮތުން ވެރިކަމުގެ ފުރަތަމަ ހަ މަސް ދުވަހުގެ ތެރޭގައި އެކަން ކުރައްވާނެ ކަމަށް ގާސިމު ވިދާޅުވި އެވެ.
ގާސިމު ފާހަގަކުރެއްވި ގޮތުގައި އައްޑޫގައި ހުޅުވި ފުރަތަމަ ރިސޯޓް ކަމަށްވާ ކުރީގެ ހެރަތެރަ މިހާރުގެ ކެނަރީފަކީ އޭނަ ފިނޭންސް މިނިސްޓަރުކަމުގައި ހުންނެވި ދުވަސްވަރު ހުޅުވި ރިސޯޓެކެވެ. އެ ރިސޯޓް ހުޅުވީ 2007 ގަ އެވެ.
ޝަބްގްރިއްލާ އަކީ 2008 ގައި ހުޅުވި ރިސޯޓެކެވެ. ކޮވިޑާ ދިމާކޮށް 2020 އޮގަސްޓްގައި އެތަން ބަންދުކުރި ގޮތަށް އަދިވެސް އޮތީ ނުހުޅިވި އެވެ. ނަމަވެސް އެ ރިސޯޓް އަލުން އޮޕަރޭޝަނަށް ގެންނަން ހުރި ދަތިތައް ނައްތައިލަން މީގެ ހަފުތާއެއްހާ ދުވަސް ކުރިން ސަރުކާރުން ވަނީ ޝަންގްރިއްލާގައި އޮތް ސަރުކާރުގެ 30 ޕަސެންޓް ހިއްސާ ވެސް ދޫކޮށްލައި، އެކަމުގެ އެއްބަސްވުމުގައި ސޮއިކޮށްފަ އެވެ.
ގާސިމް ވިދާޅުވީ ފާއިތުވި 15 ވަރަކަށް އަހަރުގެ ތެރޭގައި، އެކި ސަރުކާރުތަކުން ކޮރަޕްޝަނާއި އިހުމާލުގެ ސަބަބުން ޝަންގްރިއްލާ އާއި ކެނަރީފު ވެސް ވިރާނާވެ، އައްޑު އަށް ބޮޑެތި ގެއްލުންތަކެއްވެފައިިވާ ކަމަށެވެ.
"އަޅުގަނޑުމެންގެ ވެރިކަމެއްގައި ފުރަތަމަ ހަ މަސްދުވަހުގެ ތެރޭގައި މާތް ﷲ އިދާރަކުރެއްވިއްޔާ ޝަންގްރިއްލާ އާއި ހެރެތެރެ ހެދިގެންދާ ތަން ފެންނާނެ،" ގާސިމު ވިދާޅުވި އެވެ. "އަދި އޭގެއިތުރަށް ފަސް އަހަރު ހަމަވެގެންދާ އިރު، މެދުކެނޑުމެއް ނެތި ދުވާލަކު ތިން ހަތަރު އިންޓަނޭޝަނަލް ފްލައިޓް ޖައްސާތަން ތިބޭފުޅުންނަށް ފެނިވަޑައިގަންނަވާނެ."
ގަމަށް މިހާރު ދަތުރުކުރާ ހަމައެކަނި އެއާލައިނަކީ ސްރީ ލަންކަން އެއާލައިންސެވެ. އަދި ގަން އެއާޕޯޓް ތަރައްގީކުރަން ބިޔަ މަޝްރޫއެެއް ހިންގަން މިދިޔަ ޖޫން މަހުގެ ކުރީކޮޅު ވަނީ އެ މަޝްރޫއު އިފުތިހާހުކޮށްފަ އެވެ. އެގޮތުން އިންޑިއާގެ ކުންފުންޏެއް ކަމަށްވާ ރެނާޓަސްއާ ޕްރޮޖެކްޓް ހަވާލުކުރީ 2025 ގައި ނިންމާ ގޮތަށެވެ.
ގާސިމު ވިދާޅުވީ އެމްޑީޕީން ދެ ފަހަރަށް ވެރިކަންކޮށް އަދި ޕީޕީއެމުން ވެރިކަންކުރި އިރު ވެސް، އައްޑޫގެ ރައްޔިތުންނަށް ފައިދާވާ ގޮތަށް މަޝްރޫއެއް ވެސް އަދި ވަޒީފާއެއް ވެސް އުފައްދައި ދެވިފައި ނުވާ ކަމަށެވެ. އެހެންވެ އެ ދެ ޕާޓީ އަކީ "ފެއިލް" ވެފައިވާ ބައެއް ކަމަށާއި، އެ ދެ ޕާޓީން އިންތިހާބަށް ނުކުމެ ތިބި ކެންޑިޑޭޓުންނަށް ރައްޔިތުން ވޯޓު ދޭންޖެހޭ އެއްވެސް ސަބަބެއް ނެތް ކަމަށް ވެސް ގާސިމް ވިދާޅުވި އެވެ.
"އެހެން ކެންޑިޑޭޓަކު ވެސް ނެތް އަޅުގަނޑާ އެއް ހަމައެއްގައި ފަތިގަނޑު ފިރުކާލެވޭނެ ހަމަ އެކަކު ވެސް ނެތޭ." އޭނާ ވިދާޅުވި އެވެ.