ސިފައިންނާއި އެ މީހުންގެ އާއިލާތަކަށް ބޯހިޔާވަހިކަން ފޯރުކޮށް ދޭން ހުޅުމާލޭގައި ހަދާފައިވާ "ސިފްކޯ ހިޔާ" ފްލެޓް އެ ލިބޭ މީހުންނަށް އިއްޔެ ދައްކާލައިފި އެވެ.
މި ފްލެޓްތަކަކީ ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި 2013 ވަނަ އަހަރުގެ ފެށި މަޝްރޫއެކެވެ. އަދި އެ މަޝްރޫއު ކުރިއަށް ގެންގޮސްފައި ވަނީ އާބަންކޯ އާއި އާއި ނޫމަޑި ރިސޯޓް އެންޑް ރެޒިޑެންޓްސް އަދި ސިފައިންގެ ކޯޕަރޭޓިވް "ސިފްކޯ" ގުޅިގެންނެވެ.
މި މަޝްރޫއު މަސައްކަތް ކުރިއަށް ނުގޮސް ވަރަށް ބޮޑަށް ދިގުލައިގެން ގޮސްފައި ވަނިކޮށް ރައީސް އަބްދުﷲ ޔާމީންގެ ސަރުކާރުން 2016 ގައި އެ މަސައްކަތް ދެ އަހަރުގެ ތެރޭގައި ނިންމަބް އައިލެންޑް އެކްސްޕާޓް ނަމަކަށް ކިޔާ ކުންފުންޏަކާ ހަވާލުކުރި އެވެ. އެކަމަކު އެ ކުންފުނަޏަށް ވެސް ފްލެޓްތައް ނިންމާ ނުލެވުމުން މި ސަރުކާރުން ޗައިނާގެ ދަ ޓެވެންޑީ ތާޑް މެޓަލިޖިކަލް ކޮންސްޓްރަކްޝަން ގްރޫޕްއާ މަޝްރޫއު ހަވާލުކުރި އެއެވެ.
"ސިފްކޯ ހިޔާ" ފްލެޓްތައް ލިބޭ އާއިލާތަކަށް އެތަންތަން ދައްކައިލީ އިއްޔެ ހަވީރު އެވެ. ފްލެޓްތައް މިހާރު ހުރީ ހުރިހާ މަސައްކަތްތަކެއްހެން އެއްކޮށް ނިމިފަ އެވެ. ފްލެޓްތައް ދައްކާލުމުގައި ޑިފެންސް މިނިސްޓަރު މާރިޔާ އަހުމަދުދީދީ އާއި ސިފައިންގެ އިސް ވެރިން ވެސް ވަޑައިގަތެވެ.
"ސިފްކޯ ހިޔާ" ގައި ހިމެނެނީ 330 އެޕާޓްމަންޓް ހިމެނޭ ތިން ޓަވަރެވެ. ކޮންމެ އެޕާޓްމަންޓެއްގައި 900 އަކަފޫޓު ހުރެ އެވެ. މިއީ ތިން ކޮޓަރީގެ ލަގްޒަރީ ފެންވަރުގެ އެޕާޓްމަންޓްތަކެވެ.
ފްލެޓްތައް އިއްޔެ ދައްކައިލި ނަމަވެސް އެތަންތަނަށް ވަދެވޭނެ އިރެއް އަދި ހާމައެއް ނުކުރެ އެވެ.
ސިފައިންގެ އިތުރުން ފުލުހުންނަށް ހާއްސަކޮށްގެން ވެސް ބޯހިޔާވަހިކަމުގެ މަޝްރޫއެއް އަންނަނީ ހިންގަމުންނެވެ.