އަލަށް ވިދަމުން އަންނަ ޒުވާން ދެ ތަރިން ކަމަށްވާ ޖުމައްޔިލް ނިމާލާއި މަރިޔަމް މަޖުދާ ލީޑް ރޯލް ކުޅެފައިވާ "އެންމެ ފަހު ވިންދާ ޖެހެންދެން" އަންނަ އެޕްރީލް މަހުގެ 5 ގައި ރިލީޒް ކުރާ ގޮތަށް ހަމަޖައްސައިފި އެވެ.
މަޝްހޫރު ވާހަކަ ލިއުންތެރިޔާ ބިންމާ އިބްރާހީމް ވަހީދުގެ ވާހަކައަކަށް، މަހުދީ އަހުމަދު ސްކްރީންޕްލޭ ތައްޔާރުކޮޮށްފައިވާ މި ފިލްމް ޑައިރެކްޓްކޮށްފައި ވަނީ އަލީ ޝިފާއު (ޗިއްޕެ) އެވެ.
އެއީ ރާއްޖޭގެ ފުރަތަމަ 3ޑީ ފިލްމް "ފަތިިސްހަނދުވަރުގެ ފެށުން" އާއި ގިނަ ބައެއްގެ މަގުބޫލްކަން ހޯދި "ދިން ވޭނުގެ ހިތާމައިގައި" ވެސް ޑައިރެކްޓަރެވެ.
ބައެއް މީޑިއާ ރިޕޯޓްތައް ބުނާ ގޮތުން "އެންމެ ފަހު ވިންދާ ޖެހެންދެން" އަކީ ވަރަށް މަޝްހޫރު އިނގިރޭސި ވާހަކައެއް ކަމަށްވާ "ލަވް ސްޓޯރީ" އަށް ހަމަ އެ ނަމުގައި ގެނެސް ދިން ހޮލީވުޑްގެ ފިލްމެއް އިންސްޕަޔާކޮށްގެން ތައްޔާރުކޮށްފައިވާ ފިލްމެކެވެ.
ޗިއްޕެ ބުނީ މިހާރު ކުރިއަށް ދަނީ "އެންމެ ފަހު ވިންދާ ޖެހެންދެން" ގެ ޕޯސްޓް ޕްރޮޑަކްޝަންގެ އެންމެ ފަހުގެ މަސައްކަތްތައް ކަމަށެވެ.
އެގޮތުން ފިލްމްގެ ޑަބިން ވެސް ނިމި، ކުރިއަށް އޮތީ ފިލްމުގެ ބެކް މިއުޒިކް ކަމަށް އޭނާ ބުންޏެވެ.
މި ފިލްމުގެ ބެކް މިއުޒިކް ހަދައި ދެނީ ފަހަކަށް އައިސް ރާއްޖޭގައި ނިކުންނަ ގިނަ ދިވެހި ފިލްމުތަކަށް ބެކް މިއުޒިކް ހަދައި ދެމުން އަންނަ މުހައްމަދު އިކްރާމެވެ.
"އެންމެ ފަހު ވިންދާ ޖެހެންދެން" އަކީ ކާމިޔާބު ގިނަ ފިލްމްތަކެއް މިހާތަނަށް ބެލުންތެރިންނާ ހަމައަށް ގެެނެސް ދީފައިވާ ޑާކް ރެއިން އެންޓަޓައިންމަންޓްގެ ފިލްމެކެވެ.
ޗިއްޕެ ބުނީ މި ފިލްމަކީ ވަރަށް ތަފާތު ގޮތަކަށް ޕްރެޒެންޓްކޮށް ދީފައިވާ ކަމަށެވެ. އެހެންވެ އެކަން މި ފަހަރު ސްކްރީނުން ބެލުންތެރިންނަށް ފާހަގަވެގެން ދާނެ ކަމަށެވެ.
އަދި ހާއްސަކޮށް މިއީ އަސަރު ގަދަ ލޯބީގެ ފިލްމުތަކަށް ލޯބި ކުރާ ފަރާތްތަކަށް ވަރަށް ކަމުދާނެ ފިލްމެއް ކަމަށް ޑައިރެކްޓަރު ބުންޏެވެ.
އެގޮތުން ފިލްމުގެ ލީޑް ރޯލްގައި ޒުވާން ދެ ތަރިއަކު ހިމެނުމަކީ ވެސް ފިލްމުގެ ވަރަށް ހާއްސަ ކަމެއް ކަމަށް ޗިއްޕެ ބުންޏެވެ.
ޖުމައްޔިލާއި މަޖުދާގެ އިތުރުން "އެންމެ ފަހު ވިންދާ ޖެހެންދެން" ގެ ތަރިންގެ ތެރޭގައި މިހާރު އަރަމުން އަންނަ ޒުވާން އެކްޓަރު އަލީ އާޒިމް (ދޮން އައްޔަ) އާއި މުހައްމަދު މަނިކާއި އޭނާގެ އަންހެނުން ޝީލާ ނަޖީބާއި ހަދީޖާ އިބްރާހީމް (ކުޑަ ހައްޖަ) އާއި ރޯނު ހަސަން މަނިކާއި ކޮއްޔަ ހަސަން މަނިކު ވެސް މުހިއްމު ރޯލްތަކުން ފެނިގެން ދާނެ އެވެ.
ޑާކް ރެއިނުން ބުނީ މި ފިލްމް އެޕްރީލް މަހުގެ 5 ގައި ރިލީޒް ކުރަން ހަމަޖެހިފައިވާތީ، އެ ފިލްމްގެ ފޭސްބުކް ޕޭޖް މެދުވެރިކޮށް މިހާރު އޮންލައިންކޮށް ވެސް ޓިކެޓް ބުކް ކުރެވޭނެ ކަމަށެވެ.
އެކަމަކު އޮންލައިންކޮށް ބުކްކޮށް ދެނީ އެޕްރީލް 7،6،5 އަދި 8 ގެ ޝޯގެ ޓިކެޓެވެ. އެއީ މާޗް މަހުގެ 5 ވަނަ ދުވަހާ ހަމައަށެވެ.
އޭގެ ފަހުން އޮލިމްޕަހުން ޓިކެޓް ވިއްކަމުން ގެންދާނެ ކަމަށް ޑާކް ރެއިނުން ބުންޏެވެ.