ފުވައްމުލަކަކީ ސިޓީއަކަށް ވިޔަސް އެތަނުން ސިޓީއެއްގެ އެއްވެސް ކުލަވަރެއް ނުފެންނަ ކަމަށާއި މި ސަރުކާރުން އޮތީ ފުވައްމުލަކަށް ވަރަށް ބޮޑަށް އިހުމާލުވެފައި ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމު އިބްރާހީމް ވިދާޅުވެއްޖެ އެވެ.
ކެމްޕޭނަށް އިއްޔެ ފުވައްމުލަކަށް ވައިގެން ސަޕޯޓަރުންނާ އެކީ ބޭއްވި އެއްވުމެއްގައި ގާސިމު ވިދާޅުވީ ފުވައްމުލަކަށް ސިޓީއެއްގެ ދަރަޖަ ދީފައި އޮތަސް ކުޑަމިނުން އެތަނުގެ ބަނދަރު ވެސް ރައްޔިތުން އެންމެ ބޭނުންވާ ގޮތަށް ތަރައްގީކޮށް ދެވިފައި ނެތް ކަމަށެވެ.
ރާއްޖޭގެ އެންމެ ބޮޑު މަހުޖަނު ވިދާޅުވީ ތަނަކަށް ސިޓީއެއްގެ ދަރަޖަ ދޭ ނަމަ، އެތަނަކުން އެ ތަފާތު ވެސް ފެންނަން ޖެހޭނެ ކަމަށެވެ. އެކަމަކު ރާއްޖޭގެ އަތޮޅުތަކުން ސިޓީއެއްގެ ދަރަޖަ ދީފައި ހުރި ރަށްރަށެކޭ އާދައިގެ ކުދި ރަށްރަށެކޭ އެއްވެސް ތަފާތެއް ނެތް ކަމަށް ވިދާޅުވި އެވެ.
"މި ބޭފުޅުން ސިޓީގެ ދަރަޖަ މި ދެނީ ކޮން ކަހަލަ ސިޓީއަކަށްތޯ؟" ގާސިމު ވިދާޅުވި އެވެ. "ބޭސް ސިޓީއަކަށް ވުރެ ވެސް، ހުސް ސިޓީއުރައެއް ކަހަލަ އެއްޗަކަށް ސިޓީގެ ދަރަޖަ މި ދެއްވަނީ."
އޭނަ ވިދާޅުވީ ސިޓީއެއްގެ ދަރަޖަ ދޭ އިރު، އެތަނަކަޑް ސަރުކާރުން އިތުރު މާލީ އެހީތެރިަމމާއި ތަރައްގީ އާއި ފައިސާ ހޯދޭނެ މަގު ތަނަވަސް ވެސް ކޮށްދޭން ޖެހެ އެވެ. ނަމަވެސް އެއިން އެއްވެސް ކަމެއް ނުކޮށްދީ، ރައްޔިތުންނަށް އެއްވެސް ކުރިއެރުމެއް ނުލިބޭ ގޮތަށް ހަމައެކަނި ނަމެއްގައި ސިޓީގެ ދަރަޖަ ދެނީ ކަމަށް ގާސިމު ވިދާޅުވި އެވެ.
އެގޮތުން ފުވައްމުލަކުގެ ހާލަތަށް އިޝާރާތް ކުރައްވައި ގާސިމު ވިދާޅުވީ އެތަނަށް ސަރުކާރުން އޮތީ އިހުމާލުވެފައި ކަމަށާއި ސިޓީއެއްގެ އެއްވެސް ކުލަވަރެއް ފުވައްމުލަކުން ފެންނަން ނެތް ކަމަށެވެ.