ޖުމްހޫރީ ޕާޓީގެ ކެންޑީޑޭޓް ގާސިމް އިބްރާހިމްގެ އަނބިންގެ ތެރެއިން ފާތުމަތު ރާނިއާ އަބްދުލް ހަމީދު ވެސް ފިރިކަލުންނަށް ކެމްޕޭންކޮށް ދެއްވަން ނުކުންނަވައިފި އެވެ.
ޒުވާން ރާނިޔާ އަކީ ގާސިމްގެ ހަގު އަނބި އެވެ. އޭނަ މިހާރު ގެންދަވަނީ ރަށްރަށް ވަޑައިގެން ގާސިމަށް ކެމްޕޭންކޮށް ދެމުންނެވެ. އެގޮތުން އޭނަ އދ. ދަނގެއްޗަށް ވަޑައިގެން ޖުމްހޫފީ ޕާޓީގެ ސަޕޯޓަރުންނާ އެކީ ކެމްޕޭން ހަރަކާތްތަކެއް ހިންގާފައިވެ އެވެ.
މިހާރު އުމުރުން 23 އަހަރު ރާނިއާ އާއި ރާއްޖޭގެ އެންމެ ބޮޑު މަހުޖަނު ގާސިމް، 72، ކައިވެނިކުރީ 2020 ގަ އެވެ. ރާނިޔާ އަކީ ގާސިމްގެ އުފަން ރަށް މާމިގިއްޔަށް ނިސްތަބްވާ މީހެކެވެ.
ގާސިމްގެ އަނބިންގެ ތެރެއިން ސިޔާސީ ދާއިރާގައި އެންމެ ފުޅާކޮށް ހަރަކާތްތެރިވެވަޑައިގަންނަވަނީ ޓްރާންސްޕޯޓް މިނިސްޓަރުގެ މަގާމުގައި ހުންނެވި އައިޝަތު ނަހުލާ އެވެ. ގާސިމާ އެކީ އެންމެ އާންމުކޮށް ފެންނަ އަންބަކީ ވެސް ނަހުލާ އެވެ. އޭނަ އަކީ ޖޭޕީގެ ޑެޕިއުޓީ ލީޑަރެއް ވެސް މެ އެވެ.
މި އަހަރުގެ ރިޔާސީ އިންތިހާބަކީ ގާސިމް ވެރިކަމަށް ވާދަކުރައްވާ ތިން ވަނަ އިންތިހާބެވެ.