ބޭނުން ނުކުރެވޭ ގޮތަށް ހެދިތާ މާ ގިނަ އިރުތަކެއް ނުވަނީސް "ހަސަން ކުރުސީ" ޓްވިޓާ އެކައުންޓް ރުޖޫއަކޮށްފި އެވެ.
ވެރިފައި ވެސް ކޮށްފައިވާ މި އެކައުންޓް ރޭ ވަގުތެއްގައި ބޭނުން ނުކުރެވޭ ގޮތަށް ސަސްޕެންޑްކުރީ ޓްވިޓާގައި އުސޫލުތަކާ ހިލާފަށް އަމަލުކުރަމުންދާ ކަމަށް ބުނެ އެވެ. ނަމަވެސް "ހަސަން ކުރުސީ" މިހާރު ވަނީ އަނެއްކާ ވެސް އެނބުރި ޓްވިޓާ އަށް އައިސްފަ އެވެ.
ގިނަ ބަޔަކު ތުހުމަތުކުރާ ގޮތުގައި މި އެކައުންޓަކީ ކުރީގެ ރައީސް މުހައްމަދު ނަޝީދު ގެންގުޅުއްވާ އެކައުންޓެކެވެ. ނަމަވެސް ނަޝީދު އެކަން ދޮގުކުރައްވަ އެވެ. "ހަސަން ކުރުސީ" އެކައުންޓުން މީސްމީހުންނާ ބެހޭ ގޮތުން ސާބިތު ނުހިފޭ އެތައް ވާހަކައެއް ދައްކައި، މީހުންގެ އަބުރު ކަތިލާ ކަމަށް ވެސް ގިނަ ބަޔަކު ދެކެ އެވެ.
"ހަސަން ކުރުސީ" އަކީ ނަޝީދު ކަމަށް ބުނާތީ އެކަމުގެ ސަބަބުން "އިންތިހާ އަށް ގެއްލުންވާ ކަމަށް" ވިދާޅުވެ އެ އެކައުންޓްގެ މައްސަލަ ބަލައިދެއްވުމަށް އެދިވަޑައިގެން މި އަހަރުގެ އެޕްރީލް 17 ގައި ނަޝީދު ފުލުހުންނަށް ވެސް ހުށަހެޅުއްވި އެވެ. އަދި އެ ކައުންޓްގެ މައްސަލަ ބަލަމުން އަންނަ ކަމަށް ފުލުހުން ބުނެފައިވެ އެވެ.