އަންނަ ހޮނިހިރު ދުވަހު ރިޔާސީ އިންތިހާބު އެއްބުރުން ކާމިޔާބުކުރަން ސަޕޯޓަރުންގެ ކެމްޕޭން އެއް ގިޔަރު އަދި މަތިކޮށްލަން ރައީސް އިބްރާހީމް މުހައްމަދު ސޯލިހު އެދިވަޑައިގެންފި އެވެ.
ކެމްޕޭނަށް އައްޑު އަށް ކުރައްވާ ދަތުރުގެ ތެރެއިން މިއަދު ހުޅުދޫ ބަނދަރު ހުޅުވަން ބޭއްވި ރަސްމިއްޔާތަށް ފަހު ކެމްޕޭން ޓީމަކާ ބައްދަލުކުރައްވައި ރައީސް ވިދާޅުވީ ކުރިއަށް އޮތް ދެ ދުވަހު ނިދަން ވެސް އުޅޭނެ ކަމެއް ނެތް ކަމަށާއި ދެން ގެއަށް ވަންނަން ވާނީ ވޯޓުލައި ނިންމައި، ކާމިޔާބު ވެސް ހޯދައިގެން ކަމަށެވެ.
"ކެމްޕޭން ޓީމުތައް އެއް ގިޔަރު މައްޗަށް ޖައްސާލާށޭ. ކުރިއަށް މި އޮތް ދެ ދުވަހު ނިދަން އުޅޭނެ ކަމެއް ނެތް،" ރައީސް ވިދާޅުވި އެވެ. "އަޅުގަނޑުމެންނަށް ދެ ދުވަހު ތިބެވޭނެ ނުނިދާ ވެސް. އިރާދަކުރެއްވިއްޔާ އެއްބުރުން މިކަން ނިމޭނެ. އިންތިހާބުގެ ނަތީޖާއެއް ބަދަލުކޮށްލަން ބޭނުން ވަނީ އެންމެ ވޯޓެއް. ނުކުމެ އެންމެން ވެސް ވޯޓުލާށޭ. އާއިލާ އާއި ރައްޓެހިން ވެސް ނުކުމެ ވޯޓުލާށޭ."
ރައީސް ވިދާޅުވީ ގޮތުގައި އެ މަނިކުފާނު އިއްޔެ އައްޑު އަށް ވަޑައިގަތުމުން ރޭ ފެނިވަޑައގަތީ އިންތިހާބުން މޮޅުވެ، އެމްޑީޕީ އަށް ކާމިޔާބުވެފައި އޮތް މަންޒަރު ކަމަށެވެ.
"އަޅުގަނޑަށް ފެންނަނީ މިކަން ހަމަ ހަގީގަތުގައި ވެސް ނިމިފައި އޮތް ތަން." ރައީސް ވިދާޅުވި އެވެ.
ރައީސަށް މަރުހަބާ ކިޔަން އިއްޔެ ހަވީރު ރެކޯޑް އަދަދަކަށް މީހުން ގަން އެއާޕޯޓަށް ޖަމާވި އެވެ. ރައީސްގެ ކެމްޕޭން ޖަލްސާއެއް މިރޭ ހިތަދޫގައި އޮންނާނެ އެވެ.