މިއަދު ބާއްވާ ރިޔާސީ އިންތިހާބީގެ ވޯޓްލުން ހެނދުނު 8:00 ގައި ފަށަން ތައްޔާރުވެއްޖެ އެވެ.
އިލެކްޝަން ކޮމިޝަން (އީސީ) އިން ރޭ ބޭއްވި ނޫސް ކޮންފަރެންސްގައި އެތަނުގެ ނައިބު ރައީސް އިސްމާއީލް ހަބީބު ވިދާޅުވީ ވޯޓްލާން ފެށުމުގެ ހުރިހާ ތައްޔާރީތަކެއް މިހާރު ވެ ނިމިފައިވާ ކަމަށާއި ކަނޑައެޅިފައި އޮތް ގަޑީގައި މުޅި ރާއްޖޭގައި ވޯޓްލާން ފެށޭ ކަމަށެވެ.
ހެނދުނު 8:00 ގައި ވޯޓް ލާން ފަށާ އިރު 7:30 ގައި ކިއު ހަދަން ފެށޭނެ އެވެ.
ވޯޓް ލާންދާ އިރު، މުއްދަތު ހަމަނުވާ ރަސްމީ ލިޔުމެއް ބޭނުންވާނެ އެވެ. އޭގެ ތެރޭގައި އައިޑީ ކާޑު، ޕާސްޕޯޓް، ޕާސްޕޯޓު ކާޑު އަދި ލައިސަންސް ކާޑު ބޭނުން ކުރެވިދާނެ އެވެ. އަދި ވޯޓްލާން ދިއުމުގެ ކުރިން އެ މީހަކު ވޯޓްލާން ޖެހޭ މަރުކަޒާއި ފޮށި ކަށަވަރުކުރަން ވެސް އީސީން އެދިފައިވެ އެވެ. އެގޮތުން VR (SPC) އައިޑީ ނަމްބަރު ޖަހާފައި 1414 އަށް އެސްއެމް ކުރުމުން ވޯޓްލާން ޖެހޭ ފޮށި ޔަގީން ކުރެވޭނެ އެވެ.
ވޯޓްލުން ކުރިއަށް ގެންދަން ހަމަޖެހިފައި ވަނީ 4:00 ގަ އެވެ.
މި އިންތިހާބުގައި ވޯޓްލުމުގެ ހައްގު 282،395 މީހުންނަަށް ލިބިގެންވެ އެވެ. މީގެ ތެރެއިން 27،000 އަށް ވުރެ ގިނަ މީހުންނަކީ އަލަށް ވޯޓްލާ މީހުންނެވެ. ވޯޓްލާން މި އިންތިހާބަށް އީސީން ޖުމްލަ 574 ވޯޓްފޮށި ބަހައްޓާފައިވެ އެވެ މި ފަހަރު ވޯޓްފޮށި ބަހައްޓަން ނިންމީ ފަސް ގައުމެއްގަ އެވެ. އެއީ އިންޑިއާ، ސްރީ ލަންލާ، މެލޭޝިއާ، ޔޫއޭއީ އަދި އިނގިރޭސިލާތެވެ.
އީސީން ބުނީ ހަވީރު 4:00 އަށް ވޯޓްފޮށިައް ބަންދުކޮށް، ވޯޓް ގުނަން ފަށާނީ 4:30 ގައި ކަމަށެވެ.
ޖުމްލަ އަށް ކެންޑިޑޭޓަކު ވާދަކުރައްވާ މި އިންތިހާބު ބޭރުގެ އޮފިޝަލުންތަކެއް ވެސް މޮނިޓަކޮށް، އޮބްޒާވް ކުރާނެ އެވެ. ވޯޓްލުން ކުރިއަށްދާ އިރު، ރާއްޖޭގެ ހުރިހާ ހިސާބެއްގައި ފުލުހުން އިންތިހާބާ ގުޅޭ ސަލާމަތޫ ކަންކަން ބަލަހައްޓަމުން ދާނެ އެވެ.
ހަބީބު ވަނީ މިއަދުގެ އިންތިހާބަކީ އަމާންކަމާއި އޮމާންކަމާ އަދި އިންސާފުވެރިކަމާ އެކީ ކުރިއަށްދާ އިންތިހާބަކަށް ހެދުމަށް ހުރިގާ ފަރާތްތަކުން ވެސް މަސައްކަތްކޮށް ދެއްވުމަށް އެދިވަޑައިގެންފަ އެވެ.
* އިންތިހާބުގައި ވާދަކުރައްވާ ކެންޑިޑޭޓުން:
1. އުމަރު ނަސީރު (މިނިވަން ކެންޑިޑޭޓެއް)
2. ހަސަން ޒަމީލު (މިނިވަން ކެންޑިޑޭޓެއް)
3. ރައީސް އިބްރާހީމް މުހައްމަދު ސޯލިހު (އެމްޑީޕީ)
4. ޑރ. މުހައްމަދު މުއިއްޒު (ޕީއެންސީ)
5. ގާސިމު އިބްރާހީމް (ޖުމްހޫރީ ޕާޓީ)
6. އަހުމަދު ފާރިސް މައުމޫން (މިނިވަން ކެންޑިޑޭޓެއް)
7. އިލްޔާސް ލަބީބު (ދަ ޑިމޮކްރެޓްސް)
8. ކާނަލް މުހައްމަދު (ނާޒިމް އެމްއެންޕީ)
މި އިންތިހާބަކީ އެންމެ ގިނަ ކެންޑިޑޭޓުން ވާދަކުރައްވާ އިންތިހާބެވެ.