ރާއްޖޭގައި އިއްޔެ ބޭއްވި ރިޔާސީ އިންތިހާބުގައި 70،000 އަށް ވުރެ ގިނަ މީހުން ވޯޓް ނުލާ ކަމަށް ތަފާސްހިސާބުތަކުން ދައްކައިފި އެވެ.
އަށް ކެންޑީޑޭޓަކު ވާދަކުރި އިންތިހާބުގައި ވޯޓްލުމުގެ ހައްގު 282،395 މީހަކަށް ލިބިފައިވެ އެވެ. މީގެ ތެރެއިން 27،000 އަށް ވުރެ ގިނަ މީހުންނަކީ އަލަށް ވޯޓްލުމުގެ ހައްގު ލިބުނު މީހުންނެވެ. އިލެކްޝަން ކޮމިޝަން (އީސީ) ގެ ތަފާސްހިސާބުތައް ދައްކާ ގޮތުން ވޯޓް ނުލާ މީހުންގެ އަދަދު ގާތްގަނަޑާކަށް 70،599 އަށް އަރަ އެވެ.
އިންތިހާބުގައި ވޯޓްލީ 219،843 މީހުންނެވެ. އެއީ ވޯޓްލީ މީހުންގެ 80 ޕަސެންޓެވެ.
ދެހާސް އަށެއްގެ ފަހުން ރާއްޖޭގައި ބޭއްވި ރިޔާސީ އިންތިހާބުގައި ވޯޓްލާން ނުކުތް މީހުންގެ ތަފާސްހިސާބުތަކަށް ބަލާ އިރު، 2018 ގެ އިންތިހާބުގައި ވޯޓްލުމުގެ ހައްގު 233،889 މީހުންނަށް ލިބުނު އިރު، ވޯޓްލީ މީހުންގެ ނިސްބަތަކީ 89.2 ޕަސެންޓެވެ. ދެހާސް ތޭރައިގައި ވޯޓްލުމުގެ ހައްގު 218،619 މީހުންނަށް ލިބުނު އިރު، ވޯޓްލި މީހުންގެ ނިސްބަތަކީ 91.4 ޕަސެންޓެވެ. އަދި 2008 ގެ އިންތިހާބުގައި ވޯޓްލުމުގެ ހައްގު 209،292 މީހުންނަށް ލިބުނު އިރު، ވޯޓްގައި ބައިވެރިވި މީހުންގެ ނިސްބަތަކީ 86.5 ޕަސަންޓެވެ.
އެހެންވެ މި އަދަދުތަކާ އަޅާކިޔާ އިރު މިއީ 2008 ގެ ފަހުން ގިނަ ޕާޓީތައް ވާދަކުރާ އިންތިހާބުތައް ބާއްވަން ފެށި ފަހުން އެންމެ މަދުން މީހުން ވޯޓްލި އިންތިހާބެވެ.
އިއްޔެ ނެގި ވޯޓްގައި ވާދަކުރެއްވި 8 ކެންޑިޑޭޓުންނަށް ބަލާ އިރު، ދެވަނަ ދައުރަކަށް ވާދަކުރެއްވި ރައީސް އިބްރާހީމް މުހައްމަދު ސޯލިހުގެ މައްޗަށް ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ކުރި ހޯއްދަވާފައިވެ އެވެ. އިންތިހާބުގެ ވަގުތީ ނަތީޖާ ދައްކާ ގޮތުން އޭނަ އަށް 10،110 ވޯޓު ލިބިފައިވެ އެވެ. އެއީ ވޯޓުލީ މީހުންގެ 46 ޕަސެންޓެވެ. ރައީސް ސޯލިހަށް ލިބިވަޑައިގެންނެވީ 85،000 ވޯޓެވެ. އެއީ 39 ޕަސެންޓެވެ.
ނަމަވެސް އިންތިހާބު ކާމިޔާބުކުރެވޭ ވަރަށް ދެ ބޭފުޅުންނަށް ވެސް ވޯޓް ލިބިފައި ނުވާތީ، އޮތީ ދެވަނަ ބުރަކަށް ދިއުމެވެ. އެ ބުރު އޮންނާނީ މި މަހުގެ 30 ގަ އެވެ.
އިންތިހާބުގައި ވާދަކުރެއްވި ކެންޑިޑޭޓުން:
1. އުމަރު ނަސީރު (މިނިވަން ކެންޑިޑޭޓެއް)
2. ހަސަން ޒަމީލު (މިނިވަން ކެންޑިޑޭޓެއް)
3. ރައީސް އިބްރާހީމް މުހައްމަދު ސޯލިހު (އެމްޑީޕީ)
4. ޑރ. މުހައްމަދު މުއިއްޒު (ޕީއެންސީ)
5. ގާސިމު އިބްރާހީމް (ޖުމްހޫރީ ޕާޓީ)
6. އަހުމަދު ފާރިސް މައުމޫން (މިނިވަން ކެންޑިޑޭޓެއް)
7. އިލްޔާސް ލަބީބު (ދަ ޑިމޮކްރެޓްސް)
8. ކާނަލް މުހައްމަދު ނާޒިމް (އެމްއެންޕީ)
ދެވަނަ ބުރަކަށްދާ އިރު، ނަތީޖާ އަނބުރާލުމުގައި ފުރަތަމަ ބުރުގައި ވޯޓްނުލާ މީހުންގެ ވޯޓާއި ދެ ކެންޑިޑޭޓުންގެ ޕާޓީތަކާ ގުޅޭ ބައެއްގެ ވޯޓް މުހިއްމު ދައުރެއް އަދާކުރާނެ އެވެ.