ރިޔާސީ އިންތިހާބުގެ ދެވަނަ ބުރުގެ ރީ-ރަޖިސްޓްރޭޝަނަށް ދޭން ނިންމާފައި ވަނީ ދެ ދުވަސް ކަމަށާއި މި މަހުގެ މެދު ތެރޭގައި އެކަމަށް ހުޅުވައިލެވޭނެ ކަމަށް އިލެކްޝަން ކޮމިޝަން އީސީ) ގެ ރައީސް ފުއާދު ތައުފީގު ވިދާޅުވެއްޖެ އެވެ.
އޭނަ ކުރެއްވި ޓްވީޓެއްގައި ވިދާޅުވީ ރީ-ރެޖިސްޓްރޭޝަނަށް ހުޅުވައިލަން ނިންމާފައި ވަނީ މި މަހުގެ 16 އާއި 17 ކަމަށެވެ.
A very short period of 2 days will be given for reregistration for those who want to change the place voting. As of now, we allocate 16-17 September, but we will announce and gazette it. https://t.co/htwt6KwMTP
— Fuwad Thowfeek (@FuwadThowfeek) September 10, 2023
ދެވަނަ ބުރުގެ ރީ-ރަޖިސްޓްރޭޝަނަށް ހުޅުވާލަނީ އިއްޔެ ނެގި ވޯޓްގައި، ވޯޓްލީ ތަން ނޫން އެހެން ތަނަކަށް ވޯޓްލުން ބަދަލުވާ ނަމަ އެ ފުރުސަތު ދިނުމުގެ ގޮތުންނެވެ. ދެވަނަ ބުރު އޮންނާނީ މި މަހުގެ 30 ގަ އެވެ.
މި އަހަރުގެ ރިޔާސީ އިންތިހާބުގައި 8 ކެންޑިޑޭޓަކު ވާދަކުރެއްވި އިރު، ދެވަނަ ބުރަށް ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ. އިއްޔެގެ ވޯޓުން ރައީސަށް ލިބިވަޑައިގަތީ 39 ޕަސެންޓެވެ. މުއިއްޒަށް 46 ޕަސެންޓެވެ.
އިންތިހާބުގައި ވޯޓްލުމުގެ ހައްގު 282،395 މީހަކަށް ލިބިފައިވެ އެވެ. މީގެ ތެރެއިން 27،000 އަށް ވުރެ ގިނަ މީހުންނަކީ އަލަށް ވޯޓްލުމުގެ ހައްގު ލިބުނު މީހުންނެވެ. އިންތިހާބުގައި ވޯޓްލީ 219،843 މީހުންނެވެ. އެއީ ވޯޓްލީ މީހުންގެ 80 ޕަސެންޓެވެ.