ހޮނިހިރު ދުވަހު ނެގި ރިޔާސީ އިންތިހާބުގެ ނަތީޖާއާ ގުޅިގެން ދެވަނަ ބުރަކަށްދާ އިރު، އެ ބުރުގައި ވާދަކުރައްވާ ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒުގެ ކެންޑިޑޭޓް ނަމްބަރު ބަދަލު ނުވާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
ޖުމްލަ 8 ކެންޑިޑޭޓުން ވާދަކުރެއްވި ފުރަތަމަ ބުރުގައި ރައީސްގެ ކެންޑިޑޭޓް ނަމްބަރަކީ 3 އެވެ. އަދި މުއިއްޒު ކެންޑިޑޭޓް ނަމްބަރަކީ 4 އެވެ. އީސީން ބުނީ މި މަހުގެ 30 ގައި ބާއްވާ ދެވަނަ ބުރުގައި ވެސް ދެ ބޭފުޅުންގެ ނަމްބަރުތަކަކީ އެއީ ކަމަށެވެ.
ފުރަތަމަ ބުރުގައި މުއިއްޒު ވަނީ 100،000 އަށް ވުރެ ގިނަ ވޯޓާ އެކީ ރައީސްގެ މައްޗަށް ކުރި ހޯއްދަވައިފަ އެވެ. އެއީ ވޯޓްލީ މީހުންގެ 46 ޕަސެންޓާ އެކީގަ އެވެ. ރައީސަށް ލިބިވަޑައިގަތީ 39 ޕަސެންޓެވެ.
އިންތިހާބުގައި ވާދަކުރެއްވި އަނެއް ފަސް ކެންޑިޑޭޓުންނާ މި ދެ ބޭފުޅުންނާ ގާތްކުރާ އަދަދަކަށް ވެސް ވޯޓް ލިބިވަޑައެއްނުގަންނަވަ އެވެ.
އިންތިހާބުގައި ވާދަކުރެއްވި ކެންޑިޑޭޓުން:
1. އުމަރު ނަސީރު (މިނިވަން ކެންޑިޑޭޓެއް)
2. ހަސަން ޒަމީލު (މިނިވަން ކެންޑިޑޭޓެއް)
3. ރައީސް އިބްރާހީމް މުހައްމަދު ސޯލިހު (އެމްޑީޕީ)
4. ޑރ. މުހައްމަދު މުއިއްޒު (ޕީއެންސީ)
5. ގާސިމު އިބްރާހީމް (ޖުމްހޫރީ ޕާޓީ)
6. އަހުމަދު ފާރިސް މައުމޫން (މިނިވަން ކެންޑިޑޭޓެއް)
7. އިލްޔާސް ލަބީބު (ދަ ޑިމޮކްރެޓްސް)
8. ކާނަލް މުހައްމަދު ނާޒިމް (އެމްއެންޕީ)
މި އިންތިހާބުގައި ވޯޓްލުމުގެ ހައްގު 282،395 މީހުންނަަށް ލިބިގެންވެ އެވެ. މީގެ ތެރެއިން 27،000 އަށް ވުރެ ގިނަ މީހުންނަކީ އަލަށް ވޯޓްލާ މީހުންނެވެ.
އީސީން ވަނީ ދެވަނަ ބުރުގައި ވޯޓްލާ ތަން ބަދަލުވާ ނަމަ، އެފަދަ މީހުންގެ ރީ-ރަޖިސްޓްރޭޝަނަށް ދެ ދުވަސް ދޭން ނިންމައިފަ އެވެ. އަދި އެކަމަށް ހުޅުވައިލާނީ މި މަހުގެ 16 އާއި 17 އެވެ.
މި އަހަރުގެ އިންތިހާބުގައި ވޯޓްލުމުގެ ހައްގު 282،395 މީހަކަށް ލިބިފައިވެ އެވެ. ނަމަވެސް އިންތިހާބުގެ ފުރަތަމަ ބުރުގައި ވޯޓްލީ 219،843 މީހުންނެވެ. ހަތްދިހަ ހާހަށް ވުރެ ގިނަ މީހުން އިންތިހާބުގައި ވޯޓް ނުލަ އެވެ.