ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓް ހޯއްދެވި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ދެވަނަ ބުރަށް ކެމްޕޭން ފައްޓަވައިފަ އެވެ.
އޭނަ މިއަދު މެންދުރު މާލޭގެ ކެމްޕޭން ޓީމްތަކާ ބައްދަލުކުރައްވައި، ދޮރުންދޮރަށް ވެސް ހިންގަވާފައިވެ އެވެ. އަދި މިރޭ ޕީޕީއެމް ޕީޕީއެމް އޮފީހުގައި މުއިއްޒު ބައިވެރިވެވަޑައިގަންނަވާ ޖަލްސާއެއް ވެސް އޮންނާނެ އެވެ. އެ ޖަލްސާ ފަށަން ހަމަޖެހިފައި ވަނީ 8:30 ގަ އެވެ.
އިންތިހާބުގެ ފުރަތަމަ ބުރުގައި މުއިއްޒު، ރައީސް އިބްރާހީމް މުހައްމަދު ސޯލިހުގެ މައްޗަށް ކުރި ހޯއްދެވުމާ ގުޅިގެން އެކަން ފާހަގަކުރަން ރޭ އާޓިފިޝަލް ބީޗްގައި ރެލީއެއް ވެސް ބާއްވާފައިވެ އެވެ. މުއިއްޒަށް ފުރަތަމަ ބުރުން 100،00 އަށް ވުރެ ގިނަ ވޯޓް ލިބުނު އިރު، އެއީ 8 ކެންޑިޑޭޓަކު ވާދަކުރެއްވި އިންތިހާބުގެ 46.06 ޕަސެންޓެވެ.
މުއިއްޒު ދެވަނަ ބުރަށް ކެމްޕޭން ފެއްޓެވި އިރު، އޭނަ ވިދާޅުވީ އެ ބުރު ފަސޭހަކޮށް ކާމިޔާބު ކުރެވޭނެ ކަމަށެވެ. އަދި ޕީއެންސީ/ޕީޕީއެމާ ކޯލިޝަން ހަދަން ޝައުގުވެރިވާ ޕާޓީތަކަށް އެ ފުރުސަތު އޮތް ކަމަށް ވެސް ވިދާޅުވި އެވެ.
މި މަހުގެ 30 ގައި ބާއްވާ ދެވަނަ ބުރުގައި ވާދަކުރައްވަނީ ފުރަތަމަ ބުރުގައި 39.05 ޕަސެންޓް ލިބިވަޑައިގަތް ރައީސް ސޯލިހެވެ.