ރިޔާސީ އިންތިހާބުގެ ދެވަނަ ބުރަށް ޖުމްހޫރީ ޕާޓީން ކޯލިޝަން ހެދުމާ މެދު ނުވަތަ ތާއީދުކުރާނެ ކެންޑިޑޭޓެއް ނިންމުމާ މެދު މާދަމާ ގޮތެއް ނިންމާނެ ކަމަށް އެ ޕާޓީން ބުނެފި އެވެ.
މި މަހުގެ 30 ގައި ބާއްވާ ދެވަނަ ބުރަށް ވާދަކުރައްވަނީ ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.
ދެވަނަ ބުރަށް ޖޭޕީން މާދަމާ ގޮތެއް ނިންމާ އިރު، އެ ޕާޓީގެ ލީޑަރު ގާސިމް އިބްރާހީމަކީ އިންތިހާބަށް ވާދަކުރެއްވި 8 ކެންޑިޑޭޓުންގެ ތެރެއިން އެންމެ މަދުން ވޯޓް ލިބުނު އެކެކެވެ. މިދިޔަ ހޮނިހިރު ދުވަހު ބޭއްވި އިންތިހާބުގައި އޭނަ އަށް ލިބިވަޑައިގަތީ އެންމެ 5،460 ވޯޓެވެ.
ޖޭޕީން ގޮތެއް ނިންމަން ތައްޔާރުވާ އިރު، ގާސިމަކީ ރައީސް ސޯލިހަށާއި ސަރުކާރަށް ކެމްޕޭން ތެރޭގައި ވަރަށް ބޮޑަށް ފާޑު ވިދާޅުވި ބޭފުޅެކެވެ. އަދި އޭނަ އިންތިހާބަށް ނުކުންނެވީ 2018 ގެ ރިޔާސީ އިންތިހާބަށް އެމްޑީޕީއާ އެކީ ހަދާފައި އޮތް ކޯލިޝަން އާކުރަން ދިން ދައުވަތު ބޮލާލާޖެހުމަށް ފަހު އެވެ.
އަނެއްކޮޅުން ޕީއެންސީން ޖޭޕީއާ އެކީ ކޯލިޝަން ނަހަދަން، ޕީޕީއެމްގެ ލީޑަރު ކުރީގެ ރައީސް އަބްދުﷲ ޔާމީން ވަނީ މުއިއްޒަށް އަންގަވައިފަ އެވެ.
އިންތިހާބުގައި ވާދަކުރެއްވި ކާނަލް މުހައްމަދު ނާޒިމްގެ ޕާޓީ، އެމްއެންޕީން މިހާރު ވަނީ މުއިއްޒަށް ތާއީދުކުރަން ނިންމައިފަ އެވެ. ނާޒިމަކީ އިންތިހާބުގައި އެންމެ 1،907 ވޯޓް ލިބިވަޑައިގަތް ބޭފުޅެކެވެ.
އިންތިހާބުގެ ފުރަތަމަ ބުރުގައި މުއިއްޒަށް 101،635 ވޯޓް ލިބިވަޑައިގަތް އިރު، ރައީސް ސޯލިހަށް ލިބިވަޑައިގެންނެވީ 86،161 ވޯޓެވެ.