މި މަހުގެ ފަހުކޮޅު ބާއްވާ ރިޔާސީ އިންތިހާބުގެ ދެވަނަ ބުރުގައި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ތާއީދުކުރަން ނިންމައި އެމްއެންޕީން މިއަދު ޕީޕީއެމާ އެކީ ރަސްމީކޮށް ކޯލިޝަން އެއްބަސްވުމުގައި ސޮއިކޮށްފި އެވެ.
އެއްބަސްވުމުގައި ޕީޕީއެމްގެގެ ފަރާތުން ސޮއިކުރެއްވީ އެ ޕާޓީ ހިންގެވުމުގައި އިސްކޮށް ހުންނެވި ޕީއެންސީގެ ރައީސް އަބްދުއްރަހީމް އަބްދުﷲ އެވެ.
އެމްއެންޕީގެ ފަރާތުން ސޮއިކުރެއްވި ރިޔާސީ އިންތިހާބަށް ވާދަކުރެއްވި އެ ޕާޓީގެ ލީޑަރު ކާނަލް މުހައްމަދު ނާޒިމެވެ.
އޭނަ އަކީ 8 ކެންޑިޑޭޓުން ވާދަކުރައްވައި މިދިޔަ ހޮނިހިރު ދުވަހު ބޭއްވި އިންތިހާބުގެ ފުރަތަމަ ބުރުގައި އެންމެ މަދުން ވޯޓް ލިބުނު އެކެކެވެ. ނާޒިމަށް ލިބިވަޑައިގަތީ އެންމެ 1،907 ވޯޓެވެ. ރިޔާސީ އިންތިހާބުގެ ފުރަތަމަ ބުރުގައި މުއިއްޒަށް 101،635 ވޯޓް ލިބިވަޑައިގަތެވެ.
މި މަހުގެ 30 ގައި ބާއްވާ ދެވަނަ ބުރުގައި އޭނައާ ވާދަކުރައްވާނީ އެމްޑީޕީގެ ކެންޑިޑޭޓް އިބްރާހީމް މުހައްމަދު ސޯލިހެވެ. ފުރަތަމަ ބުރުގައި ރައީސަށް ލިބިވަޑައިގަތީ 86،161 ވޯޓެވެ.