މި މަހު ފަހުކޮޅު ބާއްވާ ރިޔާސީ އިންތިހާބުގެ ދެވަނަ ބުރަށް 44 މިލިއަން ރުފިޔާގެ ބަޖެޓެއް ބޭނުންވާ ކަމަށް އިލެކްޝަން ކޮމިޝަންސް (އީސީ) އިން ބުނެފި އެވެ.
އިއްޔެ ބޭއްވި ނޫސް ކޮންފަރެސްގައި ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވީ ބަޖެޓް ހޯދަން ވަރަށް އަވަހަށް ފިނޭންސް މިނިސްޓްރީ އަށް ހުށަހަޅާނެ ކަމަށެވެ. ދެވަނަ ބުރު ބާއްވަން ހަމަޖެހިފައި ވަނީ މި މަހުގެ 30 ގަ އެވެ.
"މި މަސައްކަތް ކުރެވޭނީ ބަޖެޓް ލިބިގެން. އޮފިޝަލުންނަށް އުޖޫރަ ދިނުމާއި ދަތުރުފަތުރާއި ވޯޓް ކަރުދާސް ޕްރިންޓް ކުރުމަށް ބަޖެޓް ބޭނުންވޭ،" ހަބީބު ވިދާޅުވި އެވެ. "ގަބޫލުކުރަން އެ ބަޖެޓް ފިނޭންސް މިނިސްޓްރީން ހަމަޖައްސަވައި ދެއްވާނެ ކަމަށް."
ރިޔާސީ އިންތިޚާބަށް އީސީން މަޖިލީހަށް ހުށައެޅީ 120 މިލިއަން ރުފިޔާގެ ބަޖެޓެކެވެ. އެ ވަރުގެ ބަޖެޓެއް ހުށަހެޅީ ދެވަނަ ބުރަކަށް ދާން ޖެހިދާނެ ކަމަށް ލަފާކޮށްފަ އެވެ. އެގޮތުން އިންތިހާބުގެ ފުރަތަމަ ބުރަށް 95 މިލިޔަން ރުފިޔާ އަދި ދެވަނަ ބުރު ބާއްވަން ޖެހިއް ޖެނަމަ 25 މިލިޔަން ރުފިޔާގެ ބަޖެޓެއް ކަނޑައެޅުއްވިއެވެ.
ނަމަވެސް ރައްޔިތުންގެ މަޖިލީހުން މި އަހަރުގެ ބަޖެޓުގައި އިންތިހާބީ ހަރަދަށް ދޭން ފާސްކުރީ 90 މިލިއަން ރުފިޔާގެ ބަޖެޓެކެވެ.
ޖުމްލަ 8 ކެންޑިޑޭޓަކު ފުރަތަމަ ބުރުގައި ވާދަކުރެއްވި އިރު، ދެވަނަ ބުރުގައި ވާދަކުރައްވަނީ ދެ ކެންޑިޑޭޓެކެވެ. އެއީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.