ރިޔާސީ އިންތިހާބުގެ ދެވަނަ ބުރަށް މިހާރު ކެމްޕޭން ފައްޓަވާފައިވާ ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ދެ އަތޮޅަކަށް ކެމްޕޭން ދަތުރެއް ފައްޓަވައިފި އެވެ.
އޭނަ ވަޑައިގަންނަވަން ހަމަޖެހިފައި ވަނީ އއ އާއި އދ. އަތޮޅަށެވެ. މި ދެ އަތޮޅުގެ ތެރެއިން މުއިއްޒު ފުރަތަމަ ވަޑައިގަތުމަށް ހަމަޖެހިފައި ވަނީ އއ. ބޮޑުފުޅަދުއަށެވެ. އަދި އެންމެ ފަހު ރަށެއްގެ ގޮތުގައި ވަޑައިގަންނަވަން ހަމަޖެހިފައި ވަނީ އދ. ފެންފުއްޓަށެވެ.
މިއީ ދެވަނަ ބުރުގެ ކެމްޕޭނަށް އޭނަ އަތޮޅުތަކަށް ކުރައްވާ ފުރަތަމަ ދަތުރެވެ.
މުއިއްޒަކީ މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓް ހޯއްދެވި ކެންޑިޑޭޓެވެ. އޭނަ އަށް 100،000 އަށް ވުރެ ގިނަ ވޯޓް ލިބުނު އިރު، އެއީ 8 ކެންޑިޑޭޓުން ވާދަކުރި އިންތިހާބުގެ 46 ޕަސެންޓް ވޯޓެވެ. ދެވަނަ ބުރުގައި މުއިއްޒާ ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހެވެ. އެ މަނިކުފާނަށް ފުރަތަމަ ބުރުގައި ލިބިވަޑައިގެންނެވީ 39 ޕަސެންޓެވެ.
އިންތިހާބުގެ ދެވަނަ ބުރު އޮންނާނީ މި މަހުގެ 30 ގަ އެވެ.