މިދިޔަ އަހަރު "ހީރޯޕަންޓީ" އިން ބޮލިވުޑަށް ތައާރަފްވި ޓައިގާ ޝްރޮފް ދެވަނަ ފިލްމަކަށް ސޮއިކޮށްފި އެވެ.
މި ފަހަރުގެ ފިލްމަކީ ވެސް ކުރީގެ ފިލްމް އުފެއްދި ޓީމްގެ ފިލްމެކެވެ. ފިލްމުގެ ނަމަކީ "ބާގީ: ރެބެލް ފޮ ލަވް" އެވެ.
މި ފިލްމް ޑައިރެކްޓް ކުރަނީ "ހީރޯޕަންޓީ" ގެ ވެސް ޑައިރެކްޓަރު ސަބީރު ހާނެވެ. ޕްރޮޑިއުސަރަކީ ސާޖިދު ނަދިއަދްވާލާ އެވެ.
"ބާގީ" މަސައްކަތް ވަރަށް އަވަހަށް ފަށާ ގޮތަށް ވަނީ ހަމަޖެހިފަ އެވެ. އެކަމަކު މި ފިލްމް ސިނަމާތަކަށް އަންނާނީ އެޕްރީލް 15، 2016 ގަ އެވެ.
"ބާގީ" އާ ބެހޭ ގޮތުން ޕްރޮޑިއުސަރު ސާޖިދު ބުނީ މި ފިލްމަކީ ސަލްމާން ހާން، ލިޔެ އެކްޓް ކުރި 1990 ވަނަ އަހަރުގެ ފިލްމް "ބާގީ: ރެބެލް ފޮ ލަވް" އާ ދާދި އެއް ކަހަލަ ފިލްމެއް ކަމަށެވެ.
ފިލްމުގެ ނަމާ އެއްގޮތަށް ފިލްމުގެ ކޮންސެޕްޓްގައި ވެސް ވަރަށް އެއްގޮތް ކަންތައްތަކެއް ހުންނާނެ ކަމަށް ސަލްމާންގެ "ކިކް" ޑައިރެކްޓް ކުރި ސާޖިދު ބުންޏެވެ.
އޭނާ ބުނީ މި ފިލްމާ ބެހޭ މައުލޫމާތު ސަލްމާނާ ވެސް ހިއްސާކޮށްފައިވާ ކަމަށެވެ. ސަލްމާންގެ "ބާގީ" ގެ ބަތަލާއަކީ ނަގްމާ އެވެ.
ޓައިގާގެ "ބާގީ" އަށް އަދި ބަތަލާއަކު ހަމައެއް ނުޖެހެ އެވެ.
އެކަމަކު ބައެއް މީޑިއާ ރިޕޯޓްތައް ބުނާ ގޮތުން މި ފިލްމް "ހީރޯޕަންޓީ" ގެ ބަތަލާ ކިރިތީ ސެނޯން އާއި އާލިއާ ބަޓަށް ހުށަހަޅާފައިވެ އެވެ.
އެހެން ނަމަވެސް އެކަން ސާޖިދު ވެސް އަދި ސަބީރު ވެސް ކަށަވަރެއް ނުކޮށްދެ އެވެ. އެ ޓީމުން ބުނެފައި ވަނީ ފިލްމުގެ ކާސްޓް ވަރަށް އަވަހަށް އިއުލާން ކުރާނެ ކަމަށެވެ.