ރާއްޖޭގައި އެންމެ އުފަންވި ސިޔާސީ ޕާޓީ، ދަ ޑިމޮކްރެޓްސްގެ ޕާލިމަންޓަރީ ގްރޫޕް (ޕީޖީ) ލީޑަރަކަށް މަޖިލީހުގެ މެދު ހެންވާރު ދާއިރާގެ މެމްބަރު އަލީ އާޒިމް އިންތިހާބުކޮށްފި އެވެ.
މަޖިލީހުގެ ރައީސް މުހައްމަދު ނަޝީދު އިސްކޮށް ހުންނަވައިގެން އުފެއްދި ޕާޓީގެ ޕީޖީ ގްރޫޕްގެ މަގާމުތަކަށް މެމްބަރުން އިންތިހާބުކުތީ މިއަދެވެ. އެގޮތުން ޕީޖީ ލީޑަރަކަށް އާޒިމް އިންތިހާބުކުރި އިރު، ޕީޖީ ގްރޫޕްގެ ނައިބު ލީޑަރަކަށް ހޮވުނީ ގައްދޫ ދާއިރާގެ މެމްބަރު އަހުމަދު ޒާހިރާއި މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) އެވެ.
ޕީޖީ ގްރޫޕްގެ ވިފުގެ މަގާމަށް މައްޗަންގޮޅި އުތުރު ދާއިރާގެ މެމްބަރު މުހައްމަދު ރަޝީދު އިންތިހާބުކުރި އިރު އަމީން އާންމުގެ މަގާމަށް އިންތިހާބުވީ އުނގޫފާރު ދާއިރާގެ މެމްބަރު މުހައްމަދު ވަހީދެވެ.
ޑިމޮކްރެޓްސްގެ ޕީޖީ ގްރޫޕްގެ މަގާމުތަކަށް މެމްބަރުން ހޮވުމަށް ބޭއްވި ވޯޓްގައި މަޖިލީހުގައި ތަމްސީލުކުރައްވާ 11 މެމްބަރުން ބައިވެރިވެޑައިގަތެވެ. އަދި މަގާމުތަކަށް މެމްބަރުން ހޮވުނީ 11 މެމްބަރުންގެ އިއްތިފާގުންނެވެ.
ދަ ޑިމޮކްރެޓްސް އަކީ އެމްޑީޕީގެ ރިޔާސީ ޕްރައިމަރީ އަށް ނަޝީދާއި ރައީސް އިބްރާހީމް މުހައްމަދު ސޯލިހު ވާދަކުރައްވައި ނަޝީދަށް ނާކާމިޔާބުވެވަޑައިގެން އެމްޑީޕީއާ ފެއަށް ވަޑައިގެން އުފެއްދެވި ޕާޓީއެކެވެ. މި ޕާޓީ އުފައްދަން އެމްޑީޕީގެ މަޖިލިސް މެމްބަރުންތަކެއް އެ ޕާޓީން ވަކިވެވަޑައުގަތުމުން، އެމްޑީޕީ އަށް މަޖިލީހުގެ ސުޕަ މެޖޯރިޓީ ގެއްލިފައުވެ އެވެ.
މި މަހުގެ 9 ގައި ބޭއްވި ރިޔާސީ އިންތިހާބުގައި ވެސް އެ ޕާޓީން ވާދަކުރި އެވެ. ޑިމޮކްރެޓްސް އިން ވާދަކުރެއްވީ ހުޅުދޫ ދާއިރާގެ މަޖިލިސް މެމްބަރު އިލްޔާސް ލަބީބެވެ. އަދި އޭނަ އަކީ ދެވަނަ ބުރަކަށް ދިޔަ އިންތިހާބުގެ ފުރަތަމަ ބުރުން ތިން ވަނަ އަށް ދިޔަ ކެންޑިޑޭޓެވެ.