ރިޔާސީ އިންތިހާބު ދެވަނަ ބުރަކަށް ގޮސްފައި އޮތް އިރު، އިތުރު މަގެއް ކޮށައިގެން ކުރިއަށް ދިއުން ނޫން ގޮތެއް ނެތް ކަމަށް ޑިމޮރެކްޓްސް އިންތިހާބަށް ވާދަކުރެއްވި ކެންޑިޑޭޓް އިލްޔާސް ލަބީބުގެ ރަނިންމޭޓް ހުސައިން އަމްރު ވިދާޅުވެއްޖެ އެވެ.
ދެވަނަ ބުރުގައި ވާދަކުރައްވާ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް އިޝާރާތް ކުރައްވައި، މި ސަރުކާރުގައި އެސްޓީއޯގެ މެނޭޖިން ޑިރެކްޓަރަކަށް ހުންވަނިކޮށް މަގާމުން ވަކިކުރި އަމްރު ކުރެއްވި ޓްވީޓެއްގައި ވިދާޅުވީ ކުރިއަށް ދާން އޮތް ދެ މަގު ވެސް އަނދިރިވެފައި ނާމާން ކަމަށާއި މިހާރު މަގުގެ ކޮޅަށް އާދެވިއްޖެ ކަމަށެވެ. އެކަމަކު ދެން ހުއްޓި ތިބެވެން ނެތް ކަމަށް ވިދާޅުވި އެވެ.
"އިތުރު މަގެއް ކޮށައިގެން ކުރިޔަށް ދިޔުން ނޫން ގޮތެއް ނެތް. އަޅުގަޑުމެން އެދޭ ފުދުންތެރި އަބުރުވެރި ހަޔާތެ އިރާދަކުރެއްވިއްޔާ ހޯދޭނެ." އޭނަ ވިދާޅުވި އެވެ.
އިންތިހާބުގެ ދެވަނަ ބުރުގައި ތާއީދުކުރާނެ ކެންޑިޑޭޓަކު ޑިމޮކްރެޓްސް އިން އަދި ނުނިންމަ އެވެ. އެކަމަކު ކޯލިޝަން ހަދަން އެމްޑީޕީ އާއި ޕީޕީއެމްގެ ދައުވަތު އެ ޕާޓީ އަށް ލިބިފައިވެ އެވެ. ޑިމޮކްރެޓްސްގެ ކެންޑިޑޭޓް އިލްޔާސަކީ 8 ކެންޑިޑޭޓުން ވާދަކުރެއްވި ފުރަތަމަ ބުރުގައި ތިން ވަނަ އަށް އެންމެ ގިނަ ވޯޓް ލިބިވަޑައިގަތް ކެންޑިޑޭޓެވެ.
ރިޔާސީ އިންތިހާބުގެ ދެވަނަ ބުރު އޮންނާނީ މި މަހުގެ 30 ގަ އެވެ.