މި މަހުގެ ފަހުކޮޅު ބާއްވާ ރިޔާސީ އިންތިހާބުގެ ދެވަނަ ބުރު އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހަށް ކާމިޔާބުވުން ވަރަށް ނާދިރު ކަމަށް އެ ޕާޓީގެ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މަޖިލީހުގެ ރައީސްކަން ކުރައްވާ ނަޝީދު އިސްކޮށް ހުންނަވައިގެން އުފެއްދި ދަ ޑިމޮކްރެޓްސްގެ ބައިވެރިވުން، ދެވަނަ ބުރަށް ހޯދަން އެމްޑީޕީ ކޯލިޝަން އެދިފައި ވަނިކޮށް ނަޝީދު މިއަދު ސޯޝަލް މީޑިއާގައި ވިދާޅުވީ ދެވަނަ ބުރުގައި ރައީސް ސޯލިހަށް ލިބުމަކީ ވަރަށް ނާދިރު ކަމެއް ކަމަށެވެ. ޑިމޮކްރެޓްސް އަކީ ވެސް އިންތިހާބަށް ވާދަކުރި ޕާޓީއެކެވެ. އެ ޕާޓީގެ ކެންޑިޑޭޓް އިލްޔާސް ލަބީބަކީ ފުރަތަމަ ބުރުގައި ތިން ވަނަ ލިބިވަޑައިގަތް ކެންޑިޑޭޓެވެ.
"އެމްޑީޕީ މި ވަގުތު ވިސްނަންވީ އުފެދެން އުޅޭ ރިޔާސަތުގެ ބާރުތަކާ ގުޅޭ ގޮތުން." ނަޝީދު ވިދާޅުވި އެވެ.
މި މަހުގެ 30 ގައި ބާއްވާ ދެވަނަ ބުރަށް ކޯލިޝަން ހަދަން އެމްޑީޕީން އަންނަނީ ޖުމްހޫރީ ޕާޓީއާ މަޝްވަރާކުރަމުނެވެ. އެ ޕާޓީގެ ލީޑަރު ގާސިމް އިބްރާހީމަކީ އިންތިހާބުގެ ފުރަތަމަ ބުރުގައި ވާދަކުރައްވައި އެންމެ މަދުން ވޯޓް ލިބިވަޑައިގަތް އެއް ކެންޑިޑޭޓެވެ.
އެމްޑީޕީ ކޯލިޝަންގައި މިހާރު ހިމެނެނީ އަދާލަތާއި އެމްޑީއޭ އެވެ.
އިންތިހާބުގެ ދެވަނަ ބުރުގައި ވާދަކުރައްވަނީ ރައީސް ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ. މުއިއްޒަކީ ފުރަތަމަ ބުރުގައި 100،000 އަށް ވުރެ ގިނަ ވޯޓް ހޯއްދެވި ބޭފުޅެކެވެ. ފުރަތަމަ ބުރުގައި ވާދަކުރެއްވި ކެންޑިޑޭޑުންގެ ކާނަލް މުހައްމަދު ނާޒިމްގެ އެމްއެމްޕީން މުއިއްޒަށް ތާއީދުކުރަން ނިންމައި، ޕީޕީއެމާ އެކީ ކޯލިޝަން ހަދައި މިހާރު ކެމްޕޭންގައި ވެސް ބައިވެރިވަމުންނެވެ.