މި މަހުގެ ފަހުކޮޅު ބާއްވާ ރިޔާސީ އިންތިހާބުގެ ދެވަނަ ބުރުގައި ބަހައްޓާ ވޯޓްފޮށީގެ އަދަދު މަދުވެދާނެ ކަމަށް އިލެކްޝަން ކޮމިޝަން (އީސީ) އިން ބުނެފި އެވެ.
އެތަނުން ބުނީ ވޯޓްފޮށީގެ އަދަދަށް ބަދަލެއް އަޔަސް، ފޮށިތައް ބަހައްޓާ ތަންތަނަށް އެއްވެސް ބަދަލެއް ނާންނާނެ ކަމަށެވެ.
މީގެ ހަފުތާއެއް ކުރިން ބޭއްވި ރިޔާސީ އިންތިހާބުގެ ފުރަތަމަ ބުރުގައި ޖުމްލަ 574 ވޯޓްފޮށި ބެހެއްޓި އެެވެ. އެއީ ރާއްޖެ އިން ބޭރުން ފޮށިތައް ބެހެއްޓި ފަސް ގައުމާ ވެސް އެކީގަ އެވެ.
މި މަހުގެ 30 ގައި ބާއްވާ ދެވަނަ ބުރުގައި ވޯޓްލުމުގެ ހައްގު 282،803 މީހުންނަށް ލިބިގެންވެ އެވެ. އިންތިހާބުގެ ފުރަތަމަ ބުރުގައި 8 ކެންޑިޑޭޓަކު ވާދަކުރެއްވި އިރު، ދެވަނަ ބުރަށް ވާދަކުރައްވަނީ ދެ ކެންޑިޑޭޓެކެވެ. އެއީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.