އަނެއްކާ ވެސް މީހަކު ގެއްލިގެން ހޯދަން ފަށައިފި އެވެ.
ފުލުހުން ބުނީ ގެއްލިގެން ހޯދަނީ ހދ. މަކުނުދޫ، ސިތާރާމަންޒިލް، ނާޠިފް ޢަބްދުއްސަލާމް، 28، ކަމަށެވެ. އޭނަގެ އާއިލާއާ ހަވާލާދީ ފުލުހުން ބުނީ ނާފިތުގެ ޙަބަރެއް ނުވެގެން ގެއްލިފައިވާ ކަމަށް ރިޕޯޓްކޮށްފައި ވަނީ އާދީއްތަ ދުވަހު ކަމަށެވެ. އެހެންވެ އޭނަ ހޯދުމުގެ މަސައްކަތް ފުލުހުން ކުރަމުން އަންނަ ކަމަށް ބުންޏެވެ.
ނާތިފަ މާލޭގައި ދިރިއުޅެމުން އަންނަ މީހެކެވެ. އޭނަގެ އާއިލާއާ ހަވާލާދީ ފުލުހުން ނާތިފު އެންމެ ފަހުން ފެނިފައި ވަނީ މި މަހުގެ 15 ވަނަ ދުވަހު ކަމަށާއި އޭރު ލައިގެން ހުރީ ރުއްތަކެއް ޖެހި ގަމީހަކާއި ސޯޓެއް ކަމަށެވެ.
އޭނަ ގެއްލިގެން ހޯދާތީ ނާޠިފާ ބެހޭ އެއްވެސް މައުލޫމާތެއް ލިބިފައިވާ ނަމަ ފުލުހުންގެ ހޮޓްލައިން 3322111 އަށް ނުވަތަ ހުޅުމާލެ ފޭސް 2 ޕޮލިސް ސްޓޭޝަންގެ ނަމްބަރު 9393351 އަށް ގުޅުއްވައި ހިއްސާކުރަން ފުލުހިން އެދިފައިވެ އެވެ.
ނާތިފަކީ މި ހަފުތާގައި ގެއްލިގެން ފުލުހުންނަށް ރިޕޯޓްކުރި ތިން ވަނަ މީހާ އެވެ. މި ހަފުތާގައި ގެއްލި އެންމެ ފަހުން ރިޕޯޓްކުރީ އއ. މާޅޮސް، ހުސްނޫވިލާ، ޢަލީ ރިޝާން، 21، އެވެ. ނަމަވެސް އޭނަ މިހާރު އާއިލާ އަށް ގުޅާފައިވާ ކަމަށް ފުލުހުން އިއްޔެ ބުންޏެވެ. ރިޝާންގެ ކުރިން ގެއްލިގެން ފުލުހުންނަށް ރިޕޯޓްކުރުމުން ހޯދަމުން ދަނިކޮށް ފެނުނު އަނެއް މީހާ އަކީ ހއ. ދިއްދޫ، ގުލްފާމްގެ، 50 އަހަރުގެ އިސްމާއީލް މާހިރެވެ.
ރާއްޖޭގައި ފަހަކަށް އައިސް ވީނުވީއެއް ނޭނގި މީހުިން ގެއްލޭ މައްސަލަތައް ވަރަށް ބޮޑެވެ. މީގެ ތެރޭގައި އެކި އުމުރުގެ ދެ ޖިންސްގެ މީހުން ހިމެނެ އެވެ.