އުރީދޫގެ ގޭމިން ފެސްޓިވަލް އަންނަ މަހު

"އުރީދޫ ނޭޝަން ގޭމާސް ލޭންޑް" ގެ ނަމުގައި ރާއްޖޭގައި ބާއްވާ އެންމެ ބޮޑު ގޭމިން ފެސްޓިވަލް އަންނަ މަހު ބާއްވަން އުރީދޫން ނިންމައިފި އެވެ.

ރާއްޖޭގައި މުވާސަލަތީ ހިދުމަތްދޭ ދެވަނަ ކުންފުނިން ބުނީ މި ފެސްޓިވަލް އޮންނާނީ އަންނަ މަހުގެ 19-21 އަށް ކަމަށެވެ. މި ގޭމިން ފެސްޓިވަލް ކުރިއަށް ގެންދާދީ މާލޭގައި ހުންނަ އުރީދޫ މޯލްޑިވްސް ހެޑްކުއާޓާސްގަ އެވެ.

އެ ކުންފުނިން ބުނީ މި ފެސްޓިވަލްގައި ހުރިހާ ވައްތަރެއްގެ ގޭމް ކުޅޭ މީހުންނަށް އެކަށީގެންވާ ހަރަކާތްތަކެއް ކުރިއަށް ދާނެ ކަމަށް އުރީދޫއިން ބުނެއެވެ. "އުރީދޫ ނޭޝަން ގޭމާސް ލޭންޑް" ގައި އުރީދޫ ނޭޝަން ޕަބްޖީ މޮބައިލް ފައިނަލް މެޗްތަކުގެ އިތުރުން ރޭސިން ސިމް، ފީފާ، ކޮސްޕްލޭ އަދި ޓެކަން ޓޯނަމެންޓް ހިމެނެ އެވެ.

މި ފެސްޓިވަލަށް ޖުމްލަ 185،000ރ. ރުފިޔާގެ ފައިސާގެ އިނާމު ހުށަހަޅާފައިވެ އެވެ.

* އީއޭއެފްސީ (ފީފާ): 40،000ރ. ރުފިޔާ
* ރޭސިން ސިމް ޗެލެންޖް: 25،000ރ.
* ޓެކެން މުބާރާތް: 10،000ރ.
* ކޮސްޕްލޭ މުބާރާތް: 10،000ރ.

އުރީދޫން ބުނީ ރާއްޖޭގައި ބާއްވާ އެންމެ ބޮޑު ޕަބްޖީ މުބާރާތް ކަމަށްވާ "އުރީދޫ ނޭޝަން ޕަބްޖީ މޮބައިލް ޗެމްޕިއަންޝިޕް" ގެ ފައިނަލް މެޗުތައް މިހާރު ބޭއްވުމަށް ހަމަޖެހިފައި ވަނީ ވެސް "އުރީދޫ ނޭޝަން ގޭމާސް ލޭންޑް ގޭމިން ފެސްޓިވަލް" ގެ ތެރޭގައި ކަމަށެވެ.

މި ފެސްޓިވަލްގައި ބައިވެރިވުމަށް އުރީދޫ ގޭމަރުންނަށާއި ގޭމު ކުޅުމަށް ޝައުގުވެރިކަން ހުންނަ ހުރިހާ މީހުންނަށް ވެސް ވަނީ ފުރުސަތު ހުޅުވާލައިފަ އެވެ. މިއާ ބެހޭ އިތުރު މައުލޫމާތް އުރީދޫ ނޭޝަން ވެބްސައިޓާއި ސޯޝަލް މީޑިއާގައި ހިއްސާކުރާނެ ކަމަށް އެ ކުންފުނިން ބުންޏެވެ.