ޖުމްހޫރީ ޕާޓީގެ މެމްބަރެއްގެ ގޮތުގައި ހުންނެވި އަލީ ވަހީދު އެ ޕާޓީ ދޫކުރައްވައި އެމްޑީޕީއާ ގުޅިވަޑައިގަންނަވަން އުޅުއްވާ ކަމަށް ވާހަކަ ދެކެވެން ފަށައިފި އެވެ.
މިކަމާ ބެހޭ ގޮތުން އތުބާރު ހުރި ބައެއް ފަރާތްތަކުން މައުލޫމާތު ދީފައިވާ ގޮތުގައި ރިޔާސީ އިންތިހާބުގެ ދެވަނަ ބުރުގައި ރައީސް އިބްރާހީމް މުހައްމަދު ސޯލިހަށް އަލީ ވަހީދު ތާއީދު ކުރައްވަން ނިންމަވާފައި އިރު، ރޭގެ ވަގުތެއްގައި އޭނަ ރައީސާ ބައްދަލު ވެސް ކުރައްވާފައިވެ އެވެ. އެގޮތުން އޭނަ އެމްޑީޕީއާ އަލުން ގުޅިވަޑައިގަންނަވަން ނިންމާފައިވާތީ ވަރަށް އަވަހަށް އެ ޕާޓީ އަށް ސޮއިކުރައްވާނެ ކަމަށް ވެސް މައުލޫމާތު ލިބިފައިވެ އެވެ.
އެންމެ ފުރަތަމަ ކުރީގެ ޑީއާރްޕީ މެމްބަރެއްގެ ގޮތުގައި ހުންނެވި އަލީ ވަހީދު، ކުރިން ވެސް އެމްޑީޕީގައި އުޅުއްވި އެވެ.
މި ސަރުކާރުގައި އޭނަ ޓޫރިޒަމް މިނިސްޓަރުގެ މަގާމަށް ވަޑައިގެންނެވީ ޖޭޕީގެ ސްލޮޓެއްގަ އެވެ. އެ މަގާމުގައި ހުންނަވަނިކޮށް އަލީ ވަހީދުގެ މައްޗަށް ތުހުމަތު ކުރެވުނު ޖިންސީ ގޯނާގެ ގިނަ ތުހުމަތުތަކާ ގުޅިގެން ދައުވާތައް އުފުލާފައި ވަނިކޮށް އޭނަ 2021 ގައި އިނގިރޭސިވިލާތަށް ވަޑައިގެން އެ ތަނުގައި ދެ އަހަރެއްހާ ދުވަހު އުޅުއްވުމަށް ފަހު، ރާއްޖެ ވަޑައިގަތީ މި އަހަރުގެ މެދުތެރޭގަ އެވެ.
އޭގެ ފަހުން ޖޭޕީގެ ރިޔާސީ ކެންޑިޑޭޓް ގާސިމް އިބްރާހީމަށް ކެމްޕޭން ކުރެއްވުމުގައި އަލީ ވަހީދު އިސް ދައުރެއް އަދާކުރެއްވި އެވެ. އެގޮތުން އޭނަ އަކީ ގާސިމްހެ އިންތިހާބީ އެޖެންޓް ވެސް މެ އެވެ. ގާސިމަކީ 8 ކެންޑިޑޭޓުންނާ އެކީ މި މަހުގެ 9 ގައި ބޭއްވި އިންތިހާބުގެ ފުރަތަމަ ބުރުގައި އެންމެ މަދުން ވޯޓް ލިބިވަޑައިގަތް އެއް ކެންޑިޑޭޓެވެ.
މި މަހުގެ 30 ގައި އިންތިހާބުގެ ދެވަނަ ބުރު ބާއްވާ އިރު، އޭގައި ވާދަކުރައްވާ އެއްވެސް ކެންޑިޑޭޓަކަށް ތާއީދު ނުކުރަން ޖޭޕީން އޮތީ ނިންމައިފަ އެވެ. ދެވަނަ ބުރުގައި ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.