ކައުންސިލްތަކުގެ މުވައްޒަފުންނަށް 35 ޕަސެންޓްގެ އެލަވަންސެއް ދޭން ސަރުކާރުން ނިންމުމަކީ ވަރަށް ރަނގަޅު ނިންމުމެއް ކަމަށް އައްޑޫ މޭޔަރު އަލީ ނިޒާރު ވިދާޅުވެއްޖެ އެވެ.
އިއްޔެގެ އެ ނިންމުމާ ގުޅިގެން އޭނަ ސޯޝަލް މީޑިއާގައި ވިދާޅުވީ "މިއީ ރައްޔިތުންގެ ޖީބަށް އިތުރު ތަނަވަސްކަމެއް އަންނާނެ ކަމެއް" ކަމަށެވެ.
ކައުންސިލްތަކުގެ މުވައްޒަފުންނަށް 35 ޕަސެންޓްގެ އެލަވަންސެއް ދޭން ސަރުކާރުން އިއްޔެ ނިންމީ މި އަހަރުގެ މެއި 1 ގައި ސަރުކާރުގެ ވުޒާރާތަކުގައި 35 ޕަސެންޓް އެލަވަންސް ނުލިބޭ މުވައްޒަފުންނަށް އެލަވަންސް ހަމަޖެއްސިއިރު ކައުންސިލްތަކުގެ މުވައްޒަފުން ހިމެނިފައި ނުވާތީ އެވެ. އެހެންވެ މިހާރު ނިންމާފައި ވަނީ އަންނަ މަހުގެ 1 އިން ފެށިގެން ކައުންސިލް މުވައްޒަފުންނަށް ވެސް 35 ޕަސެންޓްގެ އެލަވަންސެއް ދޭށެވެ.
މި ބަދަލާ އެކީ ސިވިލް ސާވަންޓުންނާއި ލޯކަލް ކައުންސިލްތަކުގައި މަސައްކަތްކުރާ އިދާރީ މުވައްޒަފުންގެ މުސާރައާ ދެމެދު އޮތް ފަރަގު ނައްތައިލެވޭނެ ކަމަށް ސަރުކާރުން ބުންޏެވެ.