ލިޔުންތެރިކަން ކުރިއަރުވަން މަސައްކަތް ކުރަން ޖެހޭ ކަމަށް ނައިބު ރައީސް ފައިސަލް ނަސީމު ވިދާޅުވެއްޖެ އެވެ.
ގައުމީ ޔުނިވަސިޓީގެ "ޔުނިވަސިޓީ ބުކް ރައިޓިން ގްރާންޓް" ގެ ދަށުން ފޮތްތަކެއް ނެރެދެއްވުމުގެ ރަސްމިއްޔާތުގައި މިއަދު އެ މަނިކުފާނު ވިދާޅުވީ މުޖުތަމަޢެއް ބިނާކުރުމަށް ލިޔުންތެރިންގެ ދައުރު ވަރަށް މުހިއްމު ކަމަށާއި ލިޔުންތެރިކަން ފުޅާ ދާއިރާއެއްގައި ކުރިއެރުވުމަށް ސަރުކާރުން ގިނަ މަސައްކަތްތަކެއް ކުރިއަށް އޮތް ތަނުގައި ކުރާނެ ކަމަށެވެ.
ފައިސަލް ވިދާޅުވީ ލިޔުންތެރިކަމަކީ އެބައެއްގެ ޢިލްމީ މުއްސަނދިކަން ފެތުރުމަށްޓަކައި ވަރަށް މުހިންމު ދައުރެއް އަދާކުރާ ދާއިރާއެ ކަމަށެވެ. އެހެންވެ އެ ދާއިރާއިން ފުރުޞަތު ފަހިކޮށް ދިނުމަށް ގައުމީ ޔުނިވަސިޓީން ބުކް ރައިޓިން ގްރާންޓެއް ފެށުމަކީ ވަރަށް ރަނގަޅު ނިންމުމެއް ކަމަށް ވިދާޅުވި އެވެ.
"މާދަރީ ބަހަކީ އެބައެއްގެ އަސްލު އަންގައިދޭ ކަމެއް. އެހެންވެ ދިވެހި ބަސް ކުރިއެރުވުމަށް މަސައްކަތްކުރުމން ވަރަށް މުހިއްމު.' ނައިބު ރައީސް ވިދާޅުވި އެވެ.
"ޔުނިވަސިޓީ ބުކް ރައިޓިންގގްރާންޓް" ގެ ދަށުން މި އަހަރު ތިން ލިޔުންތެރިޔަކު ފޮތް ނެރެފައިވެ އެވެ.