އެމްއެންޑީއެފް ސަދަން އޭރިއާގައި އޮޮންނަ ހެލިކޮޕްޓަރު އެއްވެސް އިރެއްގައި އުސޫލާ ހިލާފަށް ބޭނުން ނުކުރާ ކަމަށް އެމްޑީއެފުން ބުނެފި އެވެ.
ގަމުގައި ގާއިމުކޮށްފައިވާ ސަދަން ކޮމާންޑްގައި އޮންނަ ހެލިކޮޕްޓަރު ރޭ ޓެސްޓް ދަތުރަކަށް ބޭނުން ކުރުމާ ގުޅިގެން އެކަމާ ބެހޭ ގޮތުން ސޯޝަލް މީޑިއާގައި ފެތެރެމުންދިޔަ ވާހަކަތަކާ ގުޅިގެން އެމްއެންޑީފުން ބުނީ އާންމު އުސޫލުގެ ދަށުން މިހާތަނަށް ރޭގަނޑު ހެލިކޮޕްޓަރު ބޭނުން ނުކުރި ނަމަވެސް ރޭ، ހެލިކޮޕްޓަރު އުދުހުނީ ޓެސްޓް ދަތުރަކަށް ކަމަށެވެ.
އެމްއެންޑީފުން ބުނީ ރޭގަނޑުގެ ވަޤުތުތަކުގައި ހެލިކޮޕްޓަރު އޮޕަރޭޓްކުރުމަކީ ސަލާމަތާއި ރައްކާތެރިކަމު ގެގޮތުން ބަލާއިރު ނުރައްކާތެރިކަން ބޮޑު ކަމަކަށްވާތީ، އޭގެ އެކިއެކި އިންސްޓްރުމެންޓްތަކުގެ އޮޕަރޭޝަނަލް ރެޑިނަސް ހިފެހެއްޓުމަށާއި، ޕައިލެޓުން ރޭގަނޑުގެ އޮޕަރޭޝަންތަކަށް އަހުލުވެރިވުމަކީ ގަވާޢިދުން ކުރަން ޖެހޭ ކަމެއް ކަމަށެވެ.
އެތަނުން ބުނީ ހެލިކޮޕްޓަރުގައި ބަލިމީހުން އުފުލުމުގައި ރޭގަނޑު ވެސް ދަތުރުތައް ކުރަން ޖެހޭތީ، އޮޕަރޭޝަނަލް ރެޑިނަސް ހިފަހައްޓައި، ރޭގަނޑުގެ އޮޕަރޭޝަންތަކަށް ޕައިލެޓުން ފަރިތަވެ އަހުލުވެރިވުމަކީ ހެލިކޮޕްޓަރުން ދަތުރުކުރާ އެންމެހާ ފަރާތްތަކުގެ ސަލާމަތަށް ވެސް ކޮންމެހެން ކުރަންޖެހޭ ކަމެއް ކަމަށެވެ.
އެހެންވެ ކަނޑައެޅިފައިވާ ތާވަލެއްގެ ދަށުން ދުވާލާއި ރޭގަނޑުގެ ވަގުތުތަކުގައި ހެލިކޮޕްޓަރުތައް ސްޓޭޝަންކޮށްފައިވާ، އެމްއެންޑީއެފްގެ އޭރިޔާ ކޮމާންޑްތަކުގައި ޓެސްޓް ފްލައިޓްތައް ކުރިއަށް ގެންދާ ކަމަށް އެމްއެންޑީއެފުން ބުންޏެވެ. އެގޮތުން ރޭ
ގަމުގައި ހެލިކޮޕްޓަރުގެ ޓެސްޓް ފްލައިޓެއް ރޭ ބޭއްވި އެ އުސޫލުގެ ތެރެއިިން ކަމަށް ބުންޏެވެ.
ރާއްޖެ އިން ބޭނުން ކުރަނީ އިންޑިއާ އިން ދީފައިވާ ހެލިކޮޕްޓަރެވެ. ހެލިކޮޕްޓަރު އާންމުކޮށް ބޭނުން ކުރަނީ އިމަޖެންސީ ހާލަތުގައި ބަލިމީހުން އުފުލުމަށެވެ.