ރިޔާސީ އިންތިހާބުގެ ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ދަ ޑިމޮކްރެޓްސް އުން ނިންމައިފި އެވެ.
ކުރީގެ ރައީސް މުހައްމަދު އިސްކޮށް ހުންނަވައިގެން އުފެއްދި ޕާޓީން މިއަދު ނެރުނު ބަޔާނެއްގައި ބުނީ ދެވަނަ ބުރުގައި ވާދަކުރައްވާ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒަށް ވެސް ތާއީދު ނުކުރަން ނިންމާފައިވާ ކަމަށެވެ.
ޑިމޮކްރެޓްސް އިން ބުނި އެގޮތަށް ނިންމީ މިދިޔަ ހޯމަ ދުވަހު ބޭއްވި ޕާޓީގެ ކައުންސިލްގެ 7 ވަނަ ބައްދަލުވުމުގައި ނިންމި ގޮތަށް، އެމްޑީޕީ އާއީ ޕީޕީއެމަށް ހުށަހެޅި ހުށަހެޅުންތަކަށް އެ ދެ ޕާޓީން ވެސް އެއްބަސްވެފައި ނުވާތީ ކަމަށެވެ.
ރިޔާސީ އިންތިހާބުގެ ދެވަނަ ބުރު އޮންނާނީ މި މަހުގެ 30 ގަ އެވެ
ދެވަނަ ބުރުގައި އެއްވެސް ކެންޑިޑޭޓަކަށް ތާއީދު ނުކުރަން ޑިމޮރެކްޓްސް އިން ނިންމި އިރު، ރާއްޖޭގައި އެންމެ ފަހުން އުފަންވި މި ޕާޓީ އަކީ ރިޔާސީ އިންތިހާބަށް ވާދަ ވެސް ކުރި ޕާޓީއެކެވެ. އެގޮތުން ޖުމްލަ 8 ކެންޑިޑޭޓުން ވާދަކުރެއްވި އިންތިހާބުގެ ފުރަތަމަ ބުރުގައި އެ ޕާޓީގެ ކެންޑިޑޭޓް އިލްޔާސް ލަބީބަކީ ތިން ވަނަ އަށް އެންމެ ގިނަ ވޯޓް ލިބިވަޑައިގަތް ކެންޑިޑޭޓެވެ. ހުޅުދޫ ދާއިރާގެ މަޖިލިސް މެމްބަރަށް 15،839 ވޯޓް ލިބިވަޑައިގަތެވެ.
ދެވަނަ ބުރަށް ވާދަކުރާ ކެންޑޑޭޓުންގެ ތެރެއިން މުއިއްޒު ނިސްބަތްވާ އިދިކޮޅު ކޯލިޝަނާ އެކީ، ފުރަތަމަ ބުރުގައި ވާދަކުރެއްވި ކާނަލް މުހައްމަދު ނާޒިމްގެ އެމްއެންޕީން ވަނީ ޕީޕީއެމާ އެކީ ކޯލިޝަން ހަދައިފަ އެވެ.
ނަމަވެސް ދެވަނަ ބުރަށް އެމްޑީޕީއާ އިތުރު ބަޔަކު ނުގުޅެ އެވެ. އެ ޕާޓީގެ ކޯލިޝަންގައި ހިމެނެނީ އަދާލަތާއި އެމްޑީއޭ އެވެ.