ރިޔާސީ އިންތިހާބުގެ ދެވަނަ ބުރުގައި ވޯޓްލާ މަރުކަޒުތަކުގައި މަސައްކަތްކުރާނެ އޮފިޝަލުން ހޯދަން އިލެކްޝަން ކޮމިޝަން (އީސީ) އިން އިއުލާންކޮށްފި އެވެ.
އެ ކޮމިޝަނުން ބުނީ މިކަމަށް ޝައުގުވެރިވާ ފަރާތްތަކަށް މި މަހުގެ 29 އާ ހަމައަށް އެޕްލައި ކުރެވޭނެ ކަމަށެވެ. އެގޮތުން އޮންލައިންކޮށާއި އީސީ އަށް ފޯމް ހުށަހަޅައިގެން ވެސް އެޕްލައި ކުރެވޭނެ އެވެ.
އޮފިޝަލުންނަށް ކުރިމަތިލާ މީހުންނަކީ ޢުމުރުން 18 އަހަރު ފުރިފައިވާ އަދި އެއްވެސް ސިޔާސީ ޕާޓީއެއްގެ އިސް މަގާމެއް އަދާކުރަމުން ނުދާ މީހަކަށްވުމުގެ އިތުރަށް އެއްވެސް ކެންޑިޑޭޓެއްގެ ކެމްޕޭން ޙަރަކާތްތަކުގައި ޢަމަލީ ގޮތުން ބައިވެރިވާ މީހަށްވެގެން ނުވާނެ އެވެ.
އީސީން ބުނީ ވޯޓުލާ މަރުކަޒުގެ އޮފިޝަލަކަށްވުމަށް އެދި ހުށަހަޅާފައިވާ މީހަކު އޮބްޒާވަރަކަށް ނުވަތަ މޮނިޓަރަކަަށް ނުވަތަ ކެންޑިޑޭޓްގެ މަންދޫބަކަށްވުމަށް އެދި ފޯމު ހުށަހަޅައި ފާސް ދޫކޮށްފި ނަމަ، އެ މީހަކު އޮފިޝަލަކަށްވުމަށް ހުށަހެޅި ފޯމު ބާތިލުވާނެ ކަމަށެވެ.
އިންތިހާބުގެ ދެވަނަ ބުރު އޮންނާނީ މި މަހުގެ 30 ގަ އެވެ. ވާދަކުރައްވަނީ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒެވެ.
ޖުމްލަ 8 ކެންޑިޑޭޓުން ވާދަކުރެއްވި ފުރަތަމަ ބުރު އޮތީ މި މަހުގެ 9 ގަ އެވެ.