ރާއްޖޭގެ ވެރިކަން ހިންގާ ނިޒާމު ބަދަލު ކުރުމާއި ގުޅޭގޮތުން ރައްޔިތުންގެ މަޖިލީހުން ފާސް ކުރި ޤަރާރާއި ގުޅޭ ސުވާލުތަކެއް އިލެކްޝަންސް ކޮމިޝަނުން މަޖިލީހަށް ފޮނުވައިފިއެވެ.
މި ޤާރާރު މިއަދު އިލެކްޝަންސް ކޮމިޝަނަށް ލިބިފައިވާއިރު، އެ ޤަރާރާއި ގުޅޭގޮތުން އިލެކްޝަންސް ކޮމިޝަނުން ޢަމަލު ކުރާނެ ގޮތަކާއި މެދު އެ ކޮމިޝަނުން ވަނީ ޤާނޫނީ ލަފާ ހޯދާފައެވެ. އެ ލަފާގެ މަތިން ކޮމިޝަނުން އެ ފަދަ ވޯޓެއް ނެގުމުގެ ކުރިން ޖަވާބު ބޭނުންވާ ބައެއް ކަންކަން ހުރި ކަމަށް ކޮމިޝަނުން ވަނީ ބުނެފައެވެ.
ދިވެހިރާއްޖޭގައި މިހާރު އޮތް ވެރިކަމުގެ ނިޒާމު ބަދަލުކުރުމާ ގުޅޭގޮތުން، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމަށް، ރައްޔިތުންގެ މަޖިލީހުން ފާސްކުރައްވާފައިވާ ޤަރާރު، ކޮމިޝަނަށް މިއަދު ލިބި، މި ގަރާރާ މެދު، ކޮމިޝަނުން ޢަމަލު ކުރާނޭގޮތުގެ ޤާނޫނީ ލަފާ ހޯދުމަށްފަހު، އެފަދަ…
— Ismail Habeeb (@IsmailHabeeb) September 21, 2023
ކޮމިޝަންގެ ނައިބް ރައީސް އިސްމާއިލް ހަބީބު ކުރެއްވި ޓްވީޓެއްގައި ވިދާޅުވީ ޖަވާބު ހޯދުމަށް މިހާރު މަޖިލީހަށް ފޮނުވާފައިވާ ކަމަށެވެ.
ހުޅުދޫ ދައިރާގެ މަޖިލިސް މެންބަރު އިލްޔާސް ލަބީބު ހުށަހެޅުއްވި ޤާރާރު، ފާސްކޮށްފައިވަނީ މަޖިލީހުގެ 35 މެންބަރުންގެ ވޯޓާއި އެކުގައެވެ. ޤަރާރާއި ދެކޮޅަށް އެއްވެސް މެންބަރަކު ވޯޓު ނުދެއްވައެވެ.
މި ގަރާރުގައި ބުނެފައިވަނީ 30 އޮކްޓޫބަރު 2023 ގެ ކުރިން ރައްޔިތުންގެ ހިޔާލު ހޯދުމުގެ އާންމު ވޯޓަކަށް ދިއުމަށެވެ.
މި ޤަރާރު ރައީސުލްޖުމުހޫއްރީއްޔާއަށް ވެސް ވަނީ ފޮނުވާފައެވެ. ވެރިކަން ކުރާ އެމްޑީޕީން ވަނީ ނިޒާމީ ވޯޓު ރިޔާސީ އިންތިހާބަށް ފަހު ނެގުމަށް އެއްވެސް މައްސަލައެއް ނެތް ކަމަށް މީގެ ކުރިން ބުނެފައެވެ.