ދިވެހި ސަރުކާރުން އިންޑީއާއިން އިތުރު 3 ބިލިއަން ރުފިޔާގެ ލޯނެއް ނަގަން ހުށަހަޅާފައިވާ ކަމަށް ދެކެވޭ ވާހަކަ ފިނޭންސް މިނިސްޓަރ އިބްރާޙިމް އަމީރު ދޮގު ކުރައްވައިފިއެވެ.
މިނިސްޓަރ އަމީރު މިކަން ދޮގުރެއްވި އެމަނިކުފާނު ކުރެއްވި ޓްވީޓެއްގައެވެ. މިއަދު ރާއްޖޭގައި ހިންގާ މީޑީއާ އަކުން ވަނީ އިންޑީއާ ސަފީރާއި ފިނޭންސް މިނިސްޓަރ އަމީރު ބައްދަލު ކުރައްވާ އިތުރު ލޯނެއް ނެގުމަށް ހުށަހަޅާފައިވާ ކަމަށް ރިޕޯޓްކޮށްފައެވެ.
މިކަން ދޮގުކުރައްވައި ފިނޭންސް މިނިސްޓަރ އިބްރާހިމް އަމީރު ވިދާޅުވީ، އެފަދަ ކަމާކާއި ގުޅޭ ގޮތުން އެއްވެސް ފަރާތަކާއި މަޝްވަރާވެސް ކުރެވިފައި ނުވާ ކަމަށެވެ.
ސަރުކާރުން 3 ބިލިއަން ރުފިޔާގެ ލޯނެއް އިންޑިއާއިން ނަގަން ހުށަހަޅާފައިވާ ކަމަށް ބުނެ ލިޔެފައިވާ ޚަބަރަކީ ކަނޑައެޅިގެން ދޮގު ޚަބަރެއް! އެފަދަ އެއްވެސް މަޝްވަރާއެއް އެއްވެސް ފަރާތަކާއެކު ކުރިޔަށް ނުގެންދަން.
— Ibrahim Ameer (@iameeru) September 21, 2023
ދިވެހި ސަރުކާރުން ލޯނު ނަގަން އުޅެނީ އެސްބީއައިއަށް ޓްރެޝަރީ ބޮންޑު ވިއްކައިގެން ކަމަށްވެސް އެ ނޫހުން ވަނީ ރިޕޯޓްކޮށްފައެވެ. އަދި މި ފައިސާ އަކީ ރިޔާސީ އިންތިޙާބުގެ ދެވަނަ ބުރަށް ފައިސާ ޚަރަދު ކުރުމަށް ނަގާ ލޯނެއް ކަމުގައި ވަނީ ތުހުމަތުކޮށްފައެވެ. ނަމަވެސް މި މައުލޫމާތު ލިބުނު މަސްދަރެއް އެ ފަރާތުން ހާމައެއް ނުކުރެއެވެ.
އިންޑީއާ ސަރުކާރުން އިތުރު ލޯނެއް ނަގާ ކަމަށް ތުހުމަތުކޮށްފައިވާއިރު، ދިވެހި ސަރުކާރާއި އިންޑީއާއި ދެމެދު 800 މިލިއަން ޑޮލަރުގެ ލައިން އޮފް ކްރެޑިޓްއެއް ވަނީ ޤާއިމް ކުރެވިފައެވެ. މި ފައިސާއިން އައްޑޫގެ ހިންގަމުންދާ ގިނަ މަޝްރޫޢުތަކާއި، ހަނިމާދޫ އެއާޕޯޓު ތަރައްޤީގެ މަޝްރުޢޫގެ އިތުރުން މަސްވެރިކަމުގެ ސިނާޢަތުގެ ބައެއް މަޝްރުޢޫތަކަށް ފައިސާ ޙަރަދު ކުރެވެއެވެ.