ކަރަންޓު ބިލު ވަކި ވަރަކަށް ވުރެ ބޮޑު ނުވާ ގޮތް ހަދަން ފިޔަވަޅުތަކެއް އެޅުމަށް ސަރުކާރުން ނިންމައިފި އެވެ.
އެމްޑީޕީން މިރޭ މާލޭގައި ބޭއްވި ކެމްޕޭން އިވެންޓެއްގައި ވާހަކަފުޅުދައްކަވަމުން ރައީސް ވިދާޅުވީ ކެމްޕޭނުގައި ދޮރުންދޮރަށް ހިނގަން ފެށުމުން ކަރަންޓް ބިލަށް ލުޔެއް ހޯދައިދޭން ރައްޔިތުން އެދުނު ކަމަށާއި އެކަން ހައްލުކުރަން ބަދަލުތަކެއް ގެންނަން ނިންމާފައިވާ ކަމަށެވެ.
"މިހާރު މިވާ ގޮތަކީ ކަރަންޓު ބިލުގެ ވަކި ރޭޓުތަކެއް މިހުންނަނީ. ވަކި ވަރަކަށް ވުރެ ގިނައިން ބޭނުންކޮށްފިއްޔާ އަގު ބޮޑުވަމުން މިދަނީ. އަޅުގަނޑުމެން މިއަދު މި ނިންމަނީ މީހުން ދިރިއުޅޭ ކޮންމެ ގެއަކުން ވެސް ކަރަންޓު ރޭޓު ފްލެޓު ރޭޓަކުން ނަގާ ގޮތަށް،" ރައީސް ވިދާޅުވި އެވެ.
ރައީސް ވަނީ މި ބަދަލާއެކު ކިތަންމެ ގިނައިން ކަރަންޓު ބޭނުން ކުރި ނަމަވެސް ބޮޑުވާ ނިސްބަތް ދެން ހުންނާނީ ދެން ވަކި ވަރެއްގައި ހިފެހެއްޓިފައި ކަމަށްވެސް ވިދާޅުވެފަ އެވެ.
ހޫނު މޫސުމާ ދިމާކޮށް ކަރަންޓް ބޭނުން ކުރަންޖެހޭ މިންވަރު އިތުރުވެ ކަރަންޓް ބިލު ބޮޑުވުމަކީ އާންމުންގެ ބޮޑު ޝަކުވާ އެކެވެ.