ކުރިން އައްޑޫ މީޑިއާ ސެންޓަރު ހިންގި އިމާރާތުގައި ދާރުލްއާސަރެއް ހަދަން އައްޑޫ ސިޓީ ކައުންސިލުން ނިންމައިފި އެވެ.
މި އިމާރާތް ދާރުލް އާސާރަކަށްބަދަލު ކުރުމަށް ކައުންސިލުން ނިންމީ ދާދި ފަހުން ޕަބްލިކް ސާވިސް މީޑިއާ (ޕީއެސްއެމް) ގެ އިސްވެރިންނާ އެކު ކައުންސިލުން ބޭއްވުނު މަޝްވަރާތަކަށް ފަހު އެވެ. އެގޮތުން އެ އިމާރާތަކީ ޕީއެސްއެމްގެ އެއްވެސް ހިންގަމުން ނުދާ އިމާރާތަކަށްވާތީ، ކައުންސިލުގެ ބޭނުމަށް އެތަން ދޭން ނިންމީ އެވެ.
ކައުންސިލުން ކުއްޔަށް އިމާރާތް ނަގަނީ މަހަކު 2،000ރ. ކުލީގެ ގޮތުގައި ދައްކާ ގޮތަށެވެ. އަދި ކައުންސިލަށް ނަގަނީ އިމާރާތުގައި ކުރިން މީޑިއާ ނެޓް އޮފީސް ހިންގި ބައެވެ. އެތަނުގައި ދާރުލް އާސާރެއް ބިނާ ކުރުމަށް ކައުންސިލުގެ ރަސްމީ ޖަލްސާ އިން ވަނީ ނިންމައިފަ އެވެ.
ބުދަ ދުވަހު ބޭއްވި ކައުންސިލްގެ ރަސްމީ ޖަލްސާއަށް ހުށަހެޅުނު މި މައްސަލާގައި ބުނެފައި ވަނީ އެފަދަ ތަނެއް ހިންގުމަށް އައްޑޫގެ ކުރީގެ ބަނޑަހަގެއަކީ މާ ކުޑަ އިމާރާތެއް ކަމަށެވެ. އަދި އެތަނުގައި އޮފީސް ބަޔަކާ އެކީ މިކަން ކުރެވޭނެ ޖާގަ ނެތް ކަމަށް ކައުންސިލުން ބުންްޏެވެ. އެހެންވެ ޕީއެސްއެމްގެ ބިމެއްގެ ގޮތުގައި އޮތް ކުރީގެ އަތޮޅުގެ ހިންގި އިމާރާތް ކުއްޔަށް ނެގުމަށް ފެންނަ ކަމަށެވެ.
އެގޮތުން މި އިމާރާތަކީ ކުރީގެ ބަނޑަހަގެއި ކައިރީގައި ހުރި އިމާރާތެއް ކަން ވަނީ ފާހަގަކޮށްފައެވެ.
މި ހުށަހެޅުމަށް ކައުންސިލް ޖަލްސާގައި ބައިވެރިވި މެންބަރުންގެ ތެރެއިން 7 މެންބަރުންގެ ތާއީދު ވަނީ ލިބިފަ އެވެ. ހުށަހެޅުމަށް ތާއިދުކޮށްފައި ނުވަނީ ހިތަދޫ މޫލެކެޑެ ދާއިރާގެ ކައުންސިލަރު އަހުމަދު ސައީދެވެ. ވޯޓުގައި 4 ކައުންސިލަރަކު ބައިވެރިއެއް ނުވެ އެވެ.
ކުރީގެ އަތޮޅުގެ ހިނގި އިމާރާތަކީ އައްޑޫގެ ދިވެހި ރާއްޖޭގެ އަޑު ހިންގުމަށް އެންމެ ކުރީއްސުރެ ދީފައިވާ އިމާރާތެކެވެ. އަތޮޅު އޮފީސް ހިންގި ޒަމާނުން ފެށިގެން މި އިމާރާތް އެކި ގޮތްގޮތަށް ބޭނުން ކުރަމުން އައިސްފައިވަނީ ދިވެހި ރާއްޖެ އަޑާއި ޓީވީންނެވެ. ނަމަވެސް އައްޑޫސިޓީ ކައުންސިލް އުފެދި އެމްބީސީއާއި އެކު އަނގަބަހުން ކުރެވުނު މަޝްވަރާތަކަށް ފަހު ރައީސް ނަޝީދު ވެރިކަން ބަދަލުވުމާއި ދިމާކޯށް، ސިޓީ ކައުންސިލުން ވަނީ އެއްބަސްވުން އުވާލާފައެވެ.
މި މައްސަލަ ޝަރީޢަތަށް ގޮސް ފަހުން ޕަބްލިކް ސާވިސް މިޑީއާގެ ނަން މައްޗަށް ޢިމާރާތާއި އިމާރާތް ހުރި ބިން ވަނީ 2015 ވަނަ އަހަރު ރެޖިސްޓްރީކޮށްދީފަ އެވެ. ސިޓީ ކައުންސިލުން މި މައްސަލަ އިތުރަށް އިސްތިއުނާފެއް ނުކުރެ އެވެ.