އައްޑޫ މަގު ހެދުމުގެ މަޝްރޫޢުގެ ދެވަނަ ފިޔަވަހި އޮތީ ޓެންޑަރ މަރުހަލާގައި ކަމަށް ޕްލޭނިންގް މިނިސްޓްރީން ހާމަކޮށްފިއެވެ.
އައްޑޫ މަގު ހެދުމުގެ މަޝްރޫޢުއަކީ އައްޑޫގެ ހުރިހާ މަގެއް ރަނގަޅު ފެންވަރެއްގައި ހަދާ ތަރައްޤީ ކުރުމަށް ސަރުކާރުން ފަށާފައިވާ މިފަދަ އެންމެ ބިޔަ އަދި ބޮޑު މަޝްރޫޢުއެވެ. މިމަޝްރޫޢުގެ ދަށުން އައްޑޫގެ ހުރިހާ އަވަށެއްގައި މަގު ހެދުމުގެ މަސައްކަތް ކުރިއަށް އެބަ ގެންދެވެއެވެ. އެގޮތުން އައްޑޫގެ 100 ކިލޯމީޓަރަށް ވުރެ ބޮޑު ސަރަހައްދެއްގެ މަގު ހަދައި، ފެން ހިންދާ ނިޒާމު ޤާއިމްކޮށް މަގު ބައްތި ޖަހައި ކެމެރާ ސީސީޓީވީ ނެޓްވޯކަކުން ގުޅާލުމަށް ވަނީ ހަމަޖެހިފައެވެ.
މިމަޝްރުޢޫ ސަރުކާރުން ކުރިއަށް ގެންދަނީ ދެ ފިޔަވައްސަކަށް ބަހާލައިގެންނެވެ. އެގޮތުން މި މަޝްރޫޢުގެ ދެވަނަ ފިޔަވަހީގެ މަސައްކަތް އޮތީ ޓެންޑަރ މަރުހަލާގައި ކަމަށް ޕްލޭނިންގް މިނިސްޓްރީގެ ސްޓޭޓް މިނިސްޓަރ އަބްދުﷲ ސާދިޤް އައްޑޫލައިވް އިން ކުރި ސުވާލަކަށް ޖަވާބުދެއްވަމުން ވިދާޅުވިއެވެ. ނަމަވެސް މިކަމުގެ އިތުރު ތަފްސީލެއް ނުދެއްވައެވެ. ނަމަވެސް މިހާރު ދެވަނަ ފިޔަވަހީގެ މަސައްކަތަށް ޓެންޑަރ ބޯޑު މަސައްކަތް ނިންމާފައިވާކަން އައްޑޫލައިވް އަށް ވަނީ ކަށަވަރު ވެފައެވެ.
މިމަޝްރޫޢު މަސައްކަތް ދެ ކުންފުންޏަކާއި ހަވާލު ކުރެވިގެން ކުރިއަށް ދެއެވެ. އެއީ ޖީކޭޑީ ކުންފުންޏާއި އެފްކޮންސް ކުންފިނިއެވެ. މިމަސައްކަތުގެ ތެރެއިން ސްޓޯމްވޯޓަރ ޑްރެއިނޭޖް ސިސްޓަމްގެ މަސައްކަތުގެ ބޮޑުބައި މިހާރު ނިމަފައިވާއިރު، އައްޑޫގެ ރަށްރަށުގެ ގިނަ ބޮޑެތި މަގުތަކުގައި ވަނީ ތާރުއަޅާފައެވެ. އަދި ބައެއް މަގުތަކުގެ މަސައްކަތް މިހާރުވެސް ކުރިއަށްދާއިރު، ލައިޓް ބުޑުތައް ޖެހުމުގެ މަސައްކަތް މިހާރު ކުރިއަށް ދެއެވެ.
އައްޑޫސިޓީ މޭޔަރ އަލީ ނިޒާރު ވަނީ މީގެ ކުރިން ޖަލްސާއެއްގައި އައްޑޫ މަގު ހެދުމުގެ މަޝްރޫޢުގެ ތެރެއިން ފުރަތަމަ ފިޔަވަހީގައި 40 ކިލޯމީޓަރުގެ މަގު އެއްކޮށް ނިންމާނެ ކަން ހާމަކޮށްފައެވެ. އަދި ބާކީ 60 ކިލޯމީޓަރު ތާރު ނުވަތަ ގާ އަޅައިގެން ނިންމަން ސަރުކާރުން ނިންމާނީ ދެވަނަ ފިޔަވަހީގެ ތެރެއިން ކަމަށް ވަނީ ވިދާޅުވެފައެވެ. މި މަޝްރުޢޫ ފުރަތަމަ ފެށިއިރު ކޮންޓްރެކްޓް ކުރެވުނީ ސީޓީބީ ލޭޔަރ އަޅައިގެން ތާރު ނާޅާ މަގުތައް ނިންމުމަށެވެ.
ނަމަވެސް އައްޑޫގައި ކެމްޕެއިން ނިންމާލުމަށް ބޭއްވި ޖަލްސާގައި ރައީސް އިބްރާހިމް މުހައްމަދު ސާލިޙް ވަނީ ހުރިހާ މަގެއްވެސް ރަނގަޅު ފެންވަރެއްގައި ތަރައްޤީ ކުރެވިގެން ދާނެ ކަމަށް ވިދާޅުވެފައެވެ. މިއާއެކު ބާކީ ހުރިހާ މަގެއްވެސް ދެވަނަ ފިޔަވަހީގެ ތެރެއިން ނިމޭނީ ގަ އަޅައިގެން ނުވަތަ ތާރު އަޅައިގެންނެވެ.